ENTUDUMUNYE!

Modern poem by: Maison Ole Nkurrunah

Ore esiai e nkulupuoni

netiu anaa oldututai

tiatua iltauja lang’

Keme naleng’

Empepedoi sii too seseni lenkaji e Maa

Nemeishiu intarasi

keishirie yiook intarasi

naa olomoni odua too irng’enjepa lang’

Oyie kulo le nkaji e Maa

Ilooti wo ilbotorok

Natoyie ang’ naisiriri nemen ilewa ooshali

Enyeito siake!

Entudumunye enkaji e papa o yieyio

Entasho tesipata inyi

Entang’orr olosho linyi

Amuu intae eetiorie

Entudumunye siake!

Toompala o tooremeta

Teng’eno o temboron

Kake!

Enchoo eeku intae oong’orr olosho linyi

Metaa murrano inyi

Nalo ashuku enkop ang’ sidai

Ashuku e soit sampu

Arrinyu Olchorro Oirowua

Nemarikino entapipiy

Neshuku sii Osupuko le Mao narok

Neitapaash ilmang’ati ewuaso oo nkidong’i

We emakat ang’ sidai

Neshuk iyiok kirra enkaji Entorror

Amu mikirikino akata Ololulung’a

Otumutieki ilmeiruturut

Ashuu Oloisuishoi loo mbene dapashi

Leiton eudo iltarakwa

Neikirikira iloik loorkitoip

Enyeito siake!

Entooru inkishu inyi ilowuarak

Entorrinyu enkulupuoni nawaita iloorok neya iloiborr

Entudumunye iloomurrata

Enchom tempijan amuu eninyi esipata

Enyeito siake!

Nena Enkipai

Naaitayuni too nkutukie oormakaun

Muto o kenywa

Nena nakuraki irmeek inkonyek

Eilepu enkolong’ neitadoyio tenteipa

Enyeito!

Naa tenimipuopuo ang’orr aate

Neeku irkiyio loo nkera inyi ninche ireyieta

Entudumunye Olosho lai!

This entry was posted in Maasai, Maasai and tagged , , , , , . Bookmark the permalink.

Comments are closed.