Kanyioo pee ishori Ntoyie
Told by: Maika Soit
Written by: Miton Soit
Final editing: Nabo Kishu
Netii apa olameyu sapuk enkop. Neeku kemuta nkishu anaake.
Ore nabo olong, neyku emotonyi alotu enapita nkujit naanyori tengutuk.
Ning’or ake ormurrani Tuali Oleshani, nejo: “Eton apake etii enkop natii empilili”
Nedumunye aapuo eleenore. Nejo: “Maape nepuo aatum olari”.
Nelotu ormurrani nidurie nkishu enyenak pookin o ne nkanashe.
Nepuo aikar eng’ang.
Netoni apa ake ometoisho inkishu.
Neisho enkiteng’ nabo Oleshani neiu enkashe sidai oleng’: Naa keiro ena ashe.
Naa keisho ake Oleshani tenelo shoo, neikenoo ena ashe tolale liaji.Neturoki
enkanashe enkumoto tiatua aji, neikenoo tendapdapoi sapuk.
Nebik mbaka nabo olong’ neponu Ilmurran ena ang’ dama.
Neitu etum Oltung’ani ata obo. Nigil ake oponu teng’olong e-are.
Nejo mairoro kake etu ening entito.
Nikilikwanishore, neliki pokitoki.
Netoni airo omemutu, nepuo ilmurran ashuko.
Ore teng’olong e-are neponu ilmurran, netum entito
aiteder o nenyorru entito olmurrani obo tekulo neaku meitudutie
ninye olalashe. Nejokini: “Kaji kingo pee kiar
Oleshani, pee kia oiyie, onkishu?”
Nejoki entito: “Eyautu esayiet,
napikaki kule, nairajie teng’utuk olale”
Ore teipa, nening’u enkashe ng’otonye, nekwet anang’are. Nejoki enkashe: “Oleshani lai,
Kang’as ang’obu ena kaaliki ena?” Nejoki Oleshani: “Tang’asa tong’obu” Neng’obu.
Nejoki: “Milo taake aok kule, amu etipikaki esayiet.
Shomo tipika eng’utuk olale ore paalotu naro aibukoo, peeji enkashe naibuk oyie.”
Ore peyie ekenyu neponu ilmurran. Nejoki entito:
“Ketooko?” Nejoki: “Eitu” “Paa kaji taata kias?”
Nejoki entito: “Eyau embae naatii esayiet matipik kishomi”.
Ore peeku teipa, nepuonu inkishu ang’, nekwet enkashe anang’are ng’otonye.
Nejoki enkashe: “Oleshani lai, Kang’as ang’obu ena kaaliki ena?”
Nejoki: “Tang’asa tong’obu”. Neidip.
Nejoki: “Etipikaki dou embae kishomi naatii esayiet,
neeku tang’asa tipika isirkon, pee intoki aimie inkishu nintoki sii ninye keon”
Neng’as aimunyie isirkon nerem embae Osikiria. Neitoki aimunyie nkishu okeon enye.
Ore taisere,nejo irmurran maetu nikilikwani entito:“ketwa?”
Nejoki: ”Eitu” Nejo irmurran: “Keeta pae oshi entoki naliki! Paa kaji kingo?”
Nejoki entito: “Enchom eng’ara elde shani, amu ore ake pee epuonu nkishu naa keru oshi
enkiteng, negil Oleshani engoriong’.
Naajoki: “Eyau enkeene”, nikwatutu amu mekure eidim ataara ntae”
Nening enkashe pookitoki, newosh olale nekwet anang’are ng’otonye.
Nejoki enkashe: “Oleshani lai, Kang’as ang’obu ena
kaaliki ena?” Nejoki: “Tang’asa tong’obu”. Neidip.
Nejoki: “Ore taa eninko mikilep ake, amu etiaka duo entito irmurran ore ake pee eru enkiteng,
naajoki “Iyau enkeene” nikwetutu. Neeku mikilep, pee eyar lelomurran otii abori olchani.”
Neitaakuno enaa ketorwa enkiteng nejoki entito: “Iyau enkeene”
Nejo maetu irmurran.Nedumu Oleshani inareta neer pookin.
Ore peyie eidip Oleshani ataparipara ilmang’ati neidur
tolakira arrinyo enkop enye.
Ore ake peyie ebaya Oleshani ang’, neipot olkiu. Neinosaki iltung’ana pooki inaitaasa entito.
Nejoki: “Ore entito nemintayayuke olalashe olang’ata. Neeku enchoi amu irmang’ati.”
Neeku ina oshi pee etaa keyami ntoyie.