Told by: Willy Kindo (Sotmali village) Collected by:

Dr. Gerd Jendraschek (Original version with translation here)

Kan jibula,kan ni’na nyangu li’ka li’vi’,kapma vaal li’kadi.Awa ni’n ni’na yaba li’vi’ ni’na nya’ikdu nyamei yajavaak kapma vala.

Dina yaja naabi,dina ki’ka ki’sa yajavaal, jula, bani, si’si’gi’ kutka,naami’i kwavava,wugi daba ki’ka yadi. Jumi’i kwiala,wugi daba yadi.Yajan yaa kan jibula,kan daba ni’masakwal lamabagi’ni’bananan gepmaba yaa daba laba kan ki’ka li’kadi,sugwa, jula laba madi’t da yaa wakkadadi’ laba wugi daba ki’ka li’kadi.

Taal ni’na nya’ik nyamei wugi daba ni’nkat yakwai saava si’ka yadi. Yajan da an jula,baani, naami’i wugi daba kwiala ichada kaami kaula wugi daba dadi an si’si’gi’ kutdi an ni’ma ni’man kaami kaula wugi si’si’gi’ba wulaaika naami’iba wulaaidi’ kukka yakwaika ni’nkak kiyadi yani’n. Yaa kal li’vi’ nyangu laba di awak kapma li’kadi awak.Kapma kaamia,kaami laba sakwal yidi’.

Taal sakwal kaami anadi’: Kaami, tagukami, kaula,weinki’kkiya, maagi’n,wudi biyakkawi, wudi yul,kawawaim, ki’kkiya,wugi daba, waagi, kaavi wugi daba ki’ka yadi,ni’na nya’ik nyimei ki’ka yaa ni’nkat wugi daba ni’nkat saava si’di.Wugi daba saava si’di lapta ki’ka yabananan kan li’vi’ laba kayak’a wan. Wan da laba ana vi’kani’n taba.Taba kuvi ki’ki’da yaadi’.

Kuvi ki’ki’da yadananan davaak ni’na nyangu laba kuvi ki’ki’daba ki’ka taba wan kuvi sugwa,kuvi jula wakkadadi’ laba wugi daba ki’ka li’kadi kak ki’kali’di vi’ka kan ti’kani’n. Ki’ta ki’ta li’kani’n,wan daba ki’ka yaa ni’ba, sakwal laba gi’li’di’.

Kan jibula laba ni’na nyangu yajananan taba di ni’masakwal ni’bun ni’masakwal da li’kadi. Taal ni’na nya’ik’o nyameio yajanan yaa ni’nkat kuttaa yajanan ni’masakwal da kayak’a. Kan jibula laba ni’na nyangudi ni’masakwal balni’buno taba sakwal yidi’.

Walini’bana da,yuwa saanya, kodasada ali’pma wadi, taal kayak’a.Ko wudi yuwaba nyoujalali saanya tadabi’, saanya laglak di laba tado wugi daba yadi. Yajananan ta’kwa nyigi’lka, wa’l li’mi’in nyigi’lka wugi daba yadi.

Yajananan yali’ka yadan ni’n okwi gi’li’kadi’ wan da. Taba wan yaban ni’bananan taba gepmakla laba aaiwa gi’li’kadi’, Nyaula, Pali’bei, kan Waliakwi, wugula li’ka Kabagwat, aaiwa wan da laba gi’li’kadi’.

Wan yaa ni’banana ki’ta ki’ta li’kani’n taba. Awa taba kan ni’na nyangudi sakwal yika. Sakwal yija laba madi’t ni’bunba laba ti’kadi wan da. Ti’jananan dina lamabagi’ni’bana da dina da ni’masakwal da laba.

Ti’di kan vi’ka li’kani’n.

Aivop at nyaagi’k.