Told By: James Yisinduma (Sotmali village)

Collected by: Dr. Gerd Jendraschek (Original version with translation here)

Kan saaki ki’ta Pali’bei kudiba bukkatti’kawun. Kan saaki, gepma ki’ta li’li’ wan gepmaba,ni’ma gepma,wubi’t dulakwa ki’ta ti’banan wubi’t dulakwana ki’ta ki’tnanan nodakwanyana, wan nodakwanyankat kalika yaa ti’bi’t. Yaa ti’bi’t ti’ka,wan ni’ba maak taabidi,wugi maak taabi wan dina balaiyabi’ba  kwaa yaa ti’di. Yaa ti’kali’ka mi’na, yakwa yika maali kukkat walaa mi’na wa’la wakla yili’di. Yika yaa ti’li’di. Yaa ti’kali’ka mi’na yaali’di di’ ko yaa ti’li’di’.Yaa ti’li’di’, di’ wubi’t nak dulakwa,bi’la nyaan, nodakwanyan ki’ta,wutti’di’. Ti’kali’ka wan nodakwanyan ni’man yilaa, ki’pmâ yaa ti’vakat di’ki’malelaa kan gepmani’ba apmavaak ana ti’li’kadi walaa ta’kwa ki’ta kladi.

Klalaa li’ka yika nak gepmaba bi’la wa’la wakla yaa ti’bi’t.Wa’la mi’na kuttaa yika nak gepma wulaaika yika ni’ma si’vla kalba yika madi’k gepma gilaa yaa ti’bi’t. Bi’k kapma dulakwa mi’na.

Yaa ti’kali’ka, wubi’t dulakwa yaa ti’bi’t wan wa’la mi’na wakla yaa ti’bi’t yika wan wal lakwana laan wuba kavle yidi’.Yidi’, wan dukat gulaa wa’la okwi wugi ta’kwa mi’na yaa ti’bi’t.

Yaa ti’kali’ka wat ta’kwa wuba nyaan yaa ti’li’ waaka wan laan gi’li’di’. Yaa ti’bi’t ti’ka, wat ta’kwa nyaan kutti’. Nyaan kuttaa, ti’kali’ka samak ki’tnaan nadinyao nadinya ko sakwal vi’la ana yidi. Bap ki’ta okwi maal kalili’. Kalili’ waaka wat ta’kwa gi’li’li’. Gi’li’li’ wal nyaan munyaba li’li’,babla daali’li’. Wan gi’li’li’,walaa li’ka wat ta’kwakat wan wa’la alvi’la vali’la laakka gutnyala daaika yika wakkadalaa, wa’gu alvi’la maan ta’baba ak vaa kwaklalaa, wat ta’kwakat agiyabak wan wa’la va’guka kwaklalaa, wan nyaankat di’na di’nak wan ki’pma alababa klalaa mi’na yakwai li’di’ wan nyaankat Wupmâ ki’pma nau ki’li’li’. Ki’li’li’ wan nyamei tua gu kiya lakala gu ko li’di’ wugi guba mi’na li’kat. Ki’ka wugi kudiba li’kat mak’ala mi’na kuttaa yaa kudiba pi’losadali’di’. Wupmâ yaa ti’bi’t.

Yaa ti’kali’ka yika wan nyaan taba ni’mane. Ali’pma ti’li’,kan nyaankat agamak yikiyawun waa yalatti’di’ wan wa’la. Yalakka li’ka,wan nyamei kwakla kwaala wan kwaalakat vi’ka li’ka,ki’pmâ yika ti’kiyawun koa walaa wan wa’la wakkaika yika wan nyamei taaka kwaala vali’laa klokuka takalaa wan baai gilaa, baai jatti’di’ wan di’na nyageivla li’li’ laba wal gi’li’laa kwaklala takwanyaanan. Jatti’li’ agiyabak wa’la  jatti’di’ ni’bi ak wa’la jatti’di’ wal takwanyaan valika avla jatti’li’,li’kat vi’laa agiyabak gi’niba li’kat solak si’ka li’di’. Ti’ka li’ka di’kat ki’pmâ kuk’wagat ti’kadi’ laba wan baaida jakka kwaklalaa ak giyabak wan wa’la wan wan kwaala kutta wakwailaa  ni’biak vali’laa wakwai yika li’la savakuba taakadi’. Savakuba taakadi’ agiyabak, wal ta’kwa vi’laa o ki’pmâ li’wagat ti’kadi’ walaa wan di’na nyagei wan kwaala klaa agiyabak avla gili’..’ Wan gika vi’ka gika vi’li’di’ ali’pma gili’ agiyabak li’kat gi’niba mi’na solak si’laa,li’kat ki’ki’ vaivai ti’di’.

Ti’kali’ka o laba ki’pmâ ti’wagat ti’kadi’ walaa wan gu adi’kat nak savali’li’  agiyabak gu adi’ vali’laa daaika yika nyamei gu klala kal ak si’mak’adi’. Si’mak’adi’ vi’laa oo gu tuwagat ti’kadi’ walaa gu tuli’. Klowattaa wan taakali’ wan gu ki’di’ vi’laa o kan gu ki’wagat ti’kadi’ gu ki’ka vi’laa taba wan taba nyamei tal laba aaiwa si’mak’adi’, taba vi’kali’ laba. Vi’laa yalatti’kadi’:  Aa, ki’pmâ ti’kiyalian kayak’ala. Kan gepma yika vi’lu,walaa li’ka yikadi’. Yika li’kat kwaklalaa agiyabak kan gepma yidi’.

Yika gepma gabiba yika wakkadalaa vi’li’di’,adi taak buwa vaali’, wudi maak taabi, balai ti’kalia yaabi’ba kwalaa ni’ba, wuba wa’la kukka mi’na yili’di wa’la ladi nodakwanyangu wa’la kukka mi’na maalikak kwakka mi’na yika yili’di. Di’na kan wa’la yilaa di’kat vi’ka li’di’ li’ka, wan gabi li’kanau ki’laa yivakat ti’di. Wudi wa’la ladi vaali’ dina ki’labi’da taakadi ki’li’di. Ki’li’di waaka, du wan wa’lalapman pali’, di’ wan savaakadi’ laba. Savali’ka kan wa’la nya’ik okwi li’kadi’ o avla yalaa li’kadi’, waa yalatti’kadi’. Yalakka li’ka, yakwami’n. Kudukwi nyangu aaiwa wa’la okwi li’kadi wun kusi’si’ wa’la kayak’a, ko li’kawun. Kan maali kukkat yika ti’kadi. Kan wuna ki’labi’nau ki’ka ti’kiyami’n aki’mi’n. Mi’na nya’ik okwi ti’mayan li’bandaa ayibami’n. Wun kan yikatti’kawun waadi’. Waadi’ agiyabak walaa wan nau kwidi’, wa’la ki’ka di’kat icho ichada vi’ka gi’niba di’kat solak si’ka wupmâ li’di’. Ti’kali’ka wan ni’ba laptaa yidi,di’nokwi laptaa yidi’ wan wa’la laba di’na kupba yikadi’. Kupba ki’taba yibi’k. Yika wakkada wan taba yika ni’ma yuwi yika wakkadadi. Yuwige wakkadalaa kapma kapma wa’lakat wak’aladi, wulaaika mi’na maali kukka mi’na klakuli’di. Klakuli’di mi’na di’ kan paali’ di’ savali’ka wan wa’lakat bukadi’. Agwi da kusi’li’kadi,adi dina wa’la, mi’nokwi wun okwi wunkat kupba yami’n yali. Agwi da kusi’magat kiyawun waa wadi’, wan wa’la di’kat icho ichada vi’laa gi’nika wuladan, ki’ta kudiba kuvuk alnak vali’laa mi’na yaa kwaklali’di’ awat di’kat. Ak wulaaidananan ak kuvuk alnak. Yika li’ka yika gla’bu dadi’ kukka gi’li’ka kwaklalaa wubayabi’ yaa ti’jaan wan taal wa’la okwi yaa ta vaali’,di wan dina maali kutjanan,miba si’laa wa’lajan ki’ta waabuba wa’ladi. Di’ awat kan paali’ waabu waabuba miba vasalaa wa’ladi’. Wa’ladi’ walaa yaa gepma wakkadalaa,yaa yaa wakkadadi dikat klalaa wan kuttaa yajan maali yaba tuka mi’na kapma kapma kwili’di. Di’nokwi kan paali’ wan wa’la kalia vaali’,di’kat maali vi’li’k mi’na yaba tuka ni’man mi’na, tulaa agiyabak kwidi’ ki’ka kwakladi’.  Kwakladi’ yivakat ti’di’ kaain maali di’kat wugi naga kwaklalaa di’kat yaba tuka kwaklalaa madi’k kaain maali ki’ta paaladi’ agiyabak ki’ka kwakladi’ nak kaain vi’li’k ni’ma kaain vi’li’k bi’kat gika kwaklalaa klokolika takalaa bukadi’ . Mi’n yaman mi’na nya’ik nyimeikat kan maali kuttaa ayibami’n mi’na si’ba li’kali’ waa wadi’. Walaa kwidi’ di’kat icho ichada vi’ka gi’niba mi’na di’kat ba’gu si’ka yalakka, ti’kali’ka agiyabak vi’li’di’.

Wan ga’bulaa vaali’ di’kat wan maalikat wakla kaliya vaali’ laba buni kwikadi’. Buni kwidi’ agiyabak wubi’t maali kaain vi’li’k paapma vaali’dan, taba yikadi’. Yidan yidan yika li’ka yika yadavla yadavla yika li’ka yika wan di’na nyageikat yika kwapbi’geba yika wakkadadi’. Kwapbi’geba wakkadalaa yidi’ wan di’na nyagei vi’ka li’ka, kan wa’la gabiba yika ti’ka kan bablaklai yadi’ waa vi’li’di’ wubi’t kaainmali vi’li’k vaali’la wa’la vaali’davla yidi’. Yika wakkadadi’. Di’kat sava  ak ga’bulaya vaak kayak’a. Ak gepma kudi ana vi’ka li’li’. Wa’laba mi’na yili’davla yaali’davla mi’na di’na kupba mi’na budavla wadavla ti’li’li’. Yaa ti’kali’ka yika wan kaainmali yika li’kat si’mak’adi’ vi’laa, kan mi’danana ki’pmâ kiyada walaa savali’li’. Savali’li’,wan kaainmaali kumalika lakalaa,ak giyabak ni’biba vali’laa taba si’lakkadi’ wan kaain. Si’lakka kwaklalaa, ki’ta vali’laa savali’li’ ki’laa, nak ki’ta vali’laa yika kwikadi’ li’lak. Kwidi’ klalaa laba vaali’kali’ walaa ki’ka vi’ka,di’na li’si’kkat ki’ka vi’ka, ak jaagu wukka, apma jaagudala, kan apma ki’ki’dala. Walaa savali’li’ ak giyabak wubi’t paalada kaain an si’lakda kaain an klaa kuttaa yika li’la ma’lba takalaa, ak nak ki’ta klaa yikadi’ ma’lba taakadi’. Taakadi’ ki’ka vi’ka di’kak sava icho ichada vi’kali’. Vi’li’li’ li’ka ki’ka vi’ka, ki’ka vi’ka di’kat sava vi’ka wuba vi’laa kan apma da walaa savali’kali’. Savali’ka wugi wan ki’ki’pma okwi ki’li’li’. Nau ji’vwa kupmaak ana vi’kali’li’. Li’kak wa’la si’mak’adi’ ana klali’li’. Wan wal si’mak’adal .Yika taba kwaabi’t.

Ak ki’nya gabi,ak taba wata kwali’ taba yikadi’. Yika ak wan ti’kaliyabi’ yika wakkadadi’. Wakkadadi’ ak wudi gepmanadi nodakwanyangu wa’la kukka mi’na kapma kapma mi’na yidi. Ak yika wuba gekoba wulaailaa ki’ki’vaak ki’li’di di’nokwi yika wakkadadi’. A, wan wa’la ki’gian yaa wadi’. Yakwa wadi’. Naapba yimaan ana vi’wun.Yakwa, mi’na mi’na nya’ik’ak wan da laba yika kwimi’n wadi’. Wadi’ di’kak tanabi’ttaa sava gi’niba mi’na di’nkak sola si’kali’di’. Sola si’kadi’ kan naapba kuttaa kiyama  maalinanan ki’gian nak walaa di’kak maalikaain ki’ta kwikadi’. Palaa kwaklalaa agiyabak maali si’lakka icholaa palalaa taakadi’. Aki’ wadi Wuba ki’li’di’ mi’na nak maalikaain ki’ta ki’kadi’. Ki’ka gi’li’laa kwaklalaa ak ki’li’di’ di yivakat ti’kadi. Ak yivakat yalattaa yaman yakwa ki’taba yili waadi’. Wa’la, laba maatnyangu wa’la kukka waakudi di’nokwi taba waakudi’ agiyabak wan wa’la di’na kupba li’di’ yikabi’t taba. Yiban yika ak wan ni’ma yuwige wakkajana ak wupmâ . Yijanan wudi wa’la si’ki’t ko wulaaijaan ki’ta mi’na vaali’laa vakayali’di’, di’ wulaaidan vi’li’k kuvuk ki’ta kudiba li’di’ mi’na vakayali’di’. Di’na kusi’li’dan yika yika bi’la sakwak mi’na sakwak klaabi’t. Klaa wan yajan  li’bandaa yajan  yaa wan balai ti’kaliyabi’ wakwaijan taba wan maali…Taal li’bandaa yaa wulaailaa wuba maali di’kalat kuvi maali nak kuttaa yaa yaba tuka kwakladi’. Ni’ma maali vi’li’k taakadi’, wuba ki’li’kadi’. Ki’li’di’ nak maali kladi’ yaba tuka kwaklalaa di’ki’bi kukka ya’kika kwaklalaa kaainba naga vipka kwaklalaa yaba tuka kwaklalaa ’. klokulaa di’kat maalikaain vi’li’k palaa  kwaklalaa wubi’t maalikaain vi’li’k aki’ wadi’. Ki’ka kwakladi’ ak ni’ma ni’ma si’vla, ni’ma si’vla maalikaain mi’na vi’li’k ni’ma kaain mi’na bi’k agiyabak ni’ma maali mi’na naga kwaklalaa yaba tudaan di’kat wakwaika vi’li’k taakadi’. Takalaa bi’kat blak si’ka gika kwaklalaa ak bukadi’, ki’bi’t da mi’n klaa kuttaa mi’na nya’ik nyimeiak ayibami’n wadi’. Mi’na ti’ka yali’ma kaal ak mi’na nya’ik nyimeikat wun ana vi’ka li’kawun waadi’. Mi’n yaa kuttaa ayibami’n wadi’. Wadi’ di’kat icho ichada vi’ka di’kat sola si’ka, di’kat di’na ka’ikkak icho ichada ti’kadi’. Ti’di’ li’ka agwi di’no kaasi’labi okwi li’bandaa gabuli’di’ di’kat ki’pmâ vi’ka agiyabak wan maalikaain mi’na paapma vaali’dan, ak taba kwapbi’ wulaadi’. Wan di’kat yika abani’di’ yika wakuka dalaa avayabi’ wukkili’ka. Yika wakkada taba yikadi’. Yika li’ka yika gla’bu kulun gika wakkadadi’. Li’di’ vi’laa,a ki’gian yaa walaa savali’kali’. Ak wubi’t maalikaain yika kwikadi’ laba. Kwidi’ laba nalaba ki’laa li’bi’t vi’ka li’li’, yalakkali’li’. Wugiankat oo agiandi’ kutta yada nalaba kuttaa kiyada da walaa laba klaali’. Klalaa wan maalikaain pala kwaklalaa ki’ka wugi ki’ki’pma okwi klaa ki’ka  vi’ka oo apma da kan kiyali’da waa yalakkali’kali’. Yaka kwalaa kuvuk waa nadinya yidan ak wubavala, wugiak kuchi’laa,ak wuba maalikaain vi’li’k kuttaa yikadi’. Yidi’ ki’kali’. Ki’laa ti’ka yalatti’kali’,kan gepma aba li’di’ anakandi’ yila yalakala, kan kapma li’wa la, dunyangu kwidi kiyali’kadi’ li’ waa yalatti’kali’ li’la mauk mi’na buli’kali’. Ti’kali’ka, ti’ka akkiyabak taba ak wubayabi’ yikadi’. Yika wakkadalaa taba wal wan gabi wakkadalaa ki’taba yika di yika maalikak kuchi’ka kwakla kiyalaa laba wupmâ kukka ki’kadi laba. Ki’laa ki’ka li’ka agiyabak di’nkat mi’n yikikami’n waadi’. Yikikami’n walaa maalikaain yika wakwaika taakadi’,kai waadi’. Kai walaa savali’ka,di’kat yika ta’bak yika di’na gusamaanba kutdi’. Kutdi’ di’kak vi’di’ avayabi’ pi’li’ka wakwaikadi’. Wakwaidaan wakwailaa di’kak li’banka vi’di’ du watta li’kadi’. Ti’di’, tolaa li’di’  di’ ak wubayabi’ li’bandaa wulaaikadi’. Wulaaika yika ak di’kak yika ta’bak yikadi’ di’na gusamaanba ak waa gi’puli’ka kutdi’. Gi’puli’ka kutdi’ ak di’kak yatda vi’kadi’ wa’lakat. Vi’di’ ak wa’la laba ak avayabi’ pi’li’ka wakwaikadi’. Pi’li’ka wakwailaa di’nkat tolaa li’banka vi’kadi’ ak. Vi’di’ ak wan ki’taba maalikat yili’ba vaali’. Ana vakayaadi’ wan nodakwanyaan. Savali’si’ki’ttaa kuvuk wan ak yalamala wulaaikadi’. Wulaaika yika kan di’na gusamaanba ak gi’puli’ka kukkadi’. Kutdi’ di’kat saavadi’. Saavadi’ di’kat mi’niak vi’ka li’ka ak ma’k’at yilaa li’ka wakwaidi’.

Wakwaidi’,kan wunkak kalivakat ti’kadi’ la. Walaa yilaa vi’laa wubi’t di’na kaainda vi’li’k kusada kuttaa wa’lana kupba wakwaidi’ laba. Wa’la wakwaidi’  di’kat wa’la li’banka vi’laa laba ba’gu si’kadi’ gi’niba ba’gu si’kadi’ di’nkat kudi waa weikukadi’. O vaale,kan du wunkat kalivakat ti’kadi’ kan wa’la,waa yalakkadi’ laba. Kan wa’la wunkat kalivakat ti’kadi’ laba, kupba li’di’ wa’la tolaa li’di’ taba yikabi’t. Yika li’ka yika mi’na tamalaa mi’na li’banka vi’li’kadi’. Li’banka vi’laa di’ mi’na kupba yaali’kadi’. Yiban taba gepma kwaklalaa laba yikabi’t. Yika li’ka yika, yika mi’na li’banka vi’kadi’, wugi yaali’di’. Taba wan wa’la yalatdaan taba gepma laba si’vla yadi’ laba. Yalatdan aa wa’la savali’kadi’. Kan si’vla wunkat wakla  kiyali’dan’aan kan ni’ba yaa ti’ka kala yaa li’wa o wan kalidan du laba yalatti’kadi’. Yidi’ li’ka wuba si’vla yika li’ka laba mi’na wan di’na ti’li’da kaal wan nyagei okwi ti’da kaal taba maakali li’kali’. Maakali li’laankak di’kat abani’di’ yidi’ kwaaklakadi’ laba wan wa’la. Abani’di’ kwaklalaa ki’ta pi’li’kadi’ laba. Pi’li’dan ki’ta yika li’ka yika nyageikat yika at gaaiba li’li’ agiyabak di’ ak nyagei laba yi yaali’davaak taba vi’kali’ li’lankat yika di’kak. Wan dawa ta’ba vaasadi’ saavali’ gutnyalak daakudi’. Aa, kan wunkat kalivakat yaadi’ ak li’lo daa waakukali’ nyagei. Daa waakuli’ li’kak kuttaa kalikadi’. Kalili’di’ kalili’di’ kalili’di’ kupba wata yili’kali’ saapmabudi’ yikabi’k taba, wugi yali’ka dukat. Yika li’ka yika laba wugwi laba maakalika laba wan kaalkat yili’di’ agiyabak wan nyageikat kwaklalaa taba talaa pi’li’kadi’. Pi’li’kadi’ ki’ta yika di’kat vi’kadi’ wugi yadi’  di’okwi yaali’ka wan du laba. Yaadi’ ak di’kat vi’laa aa mi’n wunkat kwaklalaa yimi’n ti’wa waadi’. Wan di’kat sola si’ka gi’niba mi’na di’nkat ba’gu si’ka  kwaklalaa  ak wubayabi’ li’bankadi’ ak. Pi’li’ka yika wukki nyageikat vi’kadi’ ak, li’ wukkiak yali’ka. Kak taba yali’kawun wadan wukkwi laba wakwaika ti’ba kaal kwalilaba vi’laa li’li’. Kwalilaba laba kapma wakwailaa kwaali’ laba. Akwi nyagei laba wakwaika kwalilabakat laba weikuka vi’ka  ti’kali’ laba. Ak kugwi yali’ka du di’nokwi yaa kwalilabakat weikuka ti’kadi’ laba. Kukkwi laba ma’l kalika yali’, wuba li’kat vi’laa pi’li’ka yika vi’kadi’ di’no ma’l kalika yaadi’. A, kan wa’la agamak yaa yili’da waa di’no wan du gwan waa yali’kadi’. Yali’di’ yaa yaa laba kwalilabakat ti’bi’t agiyabak di’ wugi ni’di’ba vi’li’k waa wulaadi’. Wulaaika paakukadi’. Pakulaa bi’kkat awakapma mi’na  vi’ka li’kadi’. Awakapma vi’di’,wan di’na nyageikak yavolika yaa wak kwalilabakat yaa wakwaika vi’dan li’lokwi wakwaili’ di’nokwi wugwi di’nokwi yaa vi’dan taba ki’taba yaa wal vi’kabi’t.

Taba vi’laa a a wabi’t taba ko ya’k jawiyakabi’t. A kak ta’kwai walaa  savali’di’ laba. Li’lokwi vi’laa,e kan du agamak tikadi’ wali’ li’la yalak yalak ana wukkadi’ laba. Li’ gwan waali’,ana wan val ni’bakak vi’li’li’. Wuna kapma mi’na yaa ti’kawun waa yatti’li’. Li’ avla vi’laa a! wuno ki’pmâ li’kawun, kan di’no ki’pmâ li’kadi’ waa laba vi’kali’ laba. Vi’ka yalakka ti’li’ agiyabak wanei, wan di’no sava gwan waa vi’ka li’kadi’. Kan adaba la ta’kwa taa, kan kapma ta’kwa taa. Wi’ji’bai o wudubai waa ak yalakka. Yalakka ti’di’ agiyabak taba wan avi’ wan wuba wan wa’la guluk waa wakkadadi’ laba wugula aulaba li’ka wakkada wan di’kak sola si’ka,wugi di’na nyageikat sola si’ka waa li’bi’k agiyabak. Nyageikat wakka vasaadi’. Vaasadi’ yatda vi’kali’. Agwi yala kavak ma’k taakadi’ pi’li’di’ wuba nyagei laba kupba yikali’. Yili’ li’kak kwakla di’no dinkat yika ak gusamaanba kukkadi’, kutdi’ yatda vi’di’. Yada kaalak di’kat ma’k taakadi’. A li’kat vi’waankat kiyadi’ li’wa vaale ak taba libankadi’. Li’banmakat ti’ka ti’ka bukadi’ na mi’na kaainda vi’li’k wuba di’nalak kwikadi’ wa’lak. Kwidi’ kaainda vi’li’k vali’laa nyagei okwi kupba yikadi’. Yidi’ di’ laba wubayabi’ li’bandaan taba gepma yikadi’ wan du. Yika laba kwabi’k wan nyagei okwi  wan wa’la okwi yika laba kwaabi’t. Kwalaa wugiak gabiba agiyabak wan nyamei laaka ni’bu kolu wakkaika vasaadi’ laba. Ta’ba wakka vaasadi’, vi’laa wan ni’bu kolu kladali’. Kladalaa agiyabak vali’laa agiyabak wakkaika li’kat naabukat wakkaidi’, a! kan tiwaankat ti’kadi’ walaa agiyabak kolupyeinba tikali’. Tili’ wal nyamei laaka kuvi kwala ki’ta yika vaasadi’ laba ta’ba vaasadi’ wan baaida kuttaa kladali’ ni’biak vaali’di’ laba jakka kwaklalaa  agiyabak taba laavwika vi’laan kuvi kwala wukkiyal li’ka. Wan gika yaa ti’la kavle kwala takalaa wan kuvi kwala taba gikali’. Li’kat icho ichada vi’ka kwaklalaa li’kak sola si’ka li’kadi’. Ti’ka li’ka agiyabak taba gutnyala klak klak waa daa waakukadi’ taba. Daakudi’ taba dakuvakat ti’kadi’ wa’la kupba daakukali’. Daakukali’ laba baapma si’kabi’k taba tala yili’di’ kupba laba yikabi’t. Yika li’ka yika wan gepma yika wakkadaabi’t. Wakkadaa yivolika yika  wan duna gekava yika wulaaikadi’ laba. Taba gla’bu an. Gla’bu yika wulaaika yika gutnyalaba yika di’ tanabi’kkadi’ laba. Tanabi’ttaa li’ka laba maul si’kadi’, wugwak gekavakat wasokadi’. Nyagei wan ni’bukolu tika kuvi kwala gilavla  kupba li’li’. Yika tolaa agiyabak taba wasokadi’. Uuu! waa wasokadi’. Wasodi’ wugwat gaai li’a ni’ba gabuli’di. Wan nyaan okwi wuba gaaiba li’di’. Di’ nya’ik nyimei okwi nyagei okwi wuba li’di’. Wuba wasokadi’ wasodi’ ana wukkadi. Ti’di ak nak li’vi’ wasokadi’. Uuu! waadi’ wadi’ ana wukkadi. Ak wata gabuli’di, ak kuvuk wan ak waadi’ uuu! Wadi’. Wadi’ wugwi nak gaaiba li’di ak waadi’:  Oi aguli geva ni’ba wugi’da gutnyalaba ta’kwa kiyala wan wa’la wasoli’ka, avi’gutto, waadi. Wadi agiyabat wan gaai di’na nya’ik wakwaika abani’di’ li’ka ichada vi’kadi’. A! kan wa’la adaba la ta’kwa kuttaa yaa wasoli’da  kudukali li’a ni’ba buli’di waadi’. Wadi’ wata wata walaa valayadi’ nya’ik wupmâ ali’ valayadi’ wan di’na nyaan taba. Yaa ichada vi’laa wa nya’ik kal lakwakat vi’wun waadi’ yika laba kan wa’la wunkat kalidi’ waadi’. Uuu! kan ni’nkat kan taba wan nyageikat kiyali’kadi’, kan taba waadi’.Walaa waadi’  “Yakwa! Gakayami’n”  waadi’. Mi’na gaaia,gakaya waadi’, waa wuba nya’ik waadi’. Wadi’ agiyabak nyageikat li’banka vi’kadi’.

Li’ wan nyagei wan gepmakudi ana wukka li’li’. Di’ mi’na wutti’di’ samal, wutti’di’ wa’la, wan gepmakudi. Apmâ wadaankat taba nyageikat waadi’ wuba li’kat solak si’ka wa’la di’na ta’ba yakika li’la gusamaanba vasaadi’. Gutnyalak wan wa’la taba maan va’ikadi’. Ta’ba vaasadi’ agiyabak nyagei di’kat bunikupba laba vakayali’ kupba. Kupba tauli’ laba gutnyala waalkabi’t.Watka yika geva wulaaibi’t. Di’nkat vi’laa di’kat ti’ki’t kwikadi,nyaamunkat, wan wa’lakat. Di’kat kutdi kwip taakadi dikat icho ichada vi’di’ saava ti’ki’tna yilavila taabi’ li’ki’t kladaadi. Ak kan dina taabi’ li’ki’tba wakkai di’na yipmâ gwai yawaba li’di’wakka ta’ba laba vaasadi’ agiyabat savaakadi’ laba. Savaali’di’ wan dunyankat waadi  ki’ba yaa daali’nyi’n waadi’. Wan dina gaaikat vi’ka ni’bakat vi’ka kuvi yalo kuvi ki’tnan yili’ gwanat wa ak gabuli’javaakat an wuttapman, li’kat ta’bak mi’na buli’di kudikavi’ mi’na gabuli’javla, gabuli’di wupmâ li’li’. Ti’ka agiyabat nya’ik waadi’, wan di’na nyaankat. Agwi kan li’la nyaamun taba nyageikat taba gaaiak kiyadi’ wutti’di’. Agwi taakami’n ti’ka nyou klalaa yaa di’na kwapba waak waadi’. Waadi’ agiyabat wan nyaamun wan di’na nyaan laptaa yika agwi di’na nyaamunkat wal nyou klalaa yaa di’na kwalba waakkadi’. Nak ki’ta laba savaku wuba wattaa,nak ki’takat buniba waalkadi’. Waatdi’ agiyabat taba di’kat ak wakalali’di ak mi’davaakba ga’bukiyadi’. Li’kat mi’na wakala buli’di, agamak waa ta’bak buli’di,ki’pmâ ki’pmâ, aba li’wun, li’wun ti’ka di’ mi’na yaa mi’na yili’di’, ti’kali’ka yika wunkak kiyadi’ waa agiyal buli’. Buli’ nak ni’ba vi’ka li’kat glaali’di. Apmâ savali’li’ di’ laba wan nyageikat vi’ka glaa wupmâ li’di’. Wuba ti’li’di’ ti’ka ti’ka ti’ka yika agiyabat, wan gla’bu wan nyageikat kwakla yavakat ti’ka mauk si’ka glaali’di’ laba.

Taba gla’bu daali’di’ taba viyali’mala yivakat, glaa di’kat yilavilaa wan taba geva li’a ni’ba wan yaa vi’laa ni’ba wan ki’pmâ ki’pmâ wa’la ki’ta  nyageikat duna gaai kiyadi’ wadi gepmani’ba, yaa savalaa ni’ba, taba gla’buda, glaa viyali’mala daa waakudi’ wan ni’ba glaali’di. Wupmâ ti’ka yika gla’bu ki’tnan agiyabat nyageikat glaa kwaklalaa laba yikadi’. Yika nya’ik nyimei li’a kaal, taba wuba yika yaa ti’di’. Gabi kwaa jibula, ak gabiba yadi’. Yadi’ di’kat nau ki’ki’da kukka laakadi’. Ki’ka kwaklalaa wuba bi’lokwi wan di’na laandu okwi, wan nyagei okwi wuba yaa ti’di’. Wugi gepmaba yaa ti’ka ak kulamala yidi’ ak. Yidi’ oo! di’ki’malia, ana ya ti’lia kaal baagi’ lavika ti’kadi’, yakwa yili. Aba yika yaa ti’li’ li’ka di’na ti’li’ kiyakiya yidi’ di’kak kuttaa gepma kiyaikiyali waabi’t. Walaa ak taba wan di’na laandu wan taba at di’na nyageikat wadi’ “yakwa yili” wadi’ “yakwa yili” wadi’. Wuba yika di’kat wakla yaa ti’bi’t. Taba jaabwi laba ni’bi daa yika taba kiyaa kwaakladi’ wan wa’la kiyadi’. Di’na si’m baai kuttaa viyali’mala gepmaba yaa gulaa wuba gepmaba ki’tayati’ yaa ti’di’.

Aivopma saaki.