Collected by: Dr. Gerd Jendraschek

Kan gepma, Sotmali,taal wakka sawiyali’ kangepma,Sotmali.

Ni’masakwal ni’ba kan gepmaba li’ka sevlidi’.

Du ta’kwa kan gepmaba sakwal yidi’,sakwal yilaa kalklat yidi’ aaiwa.

Kan gepmaba ti’daan di’na geko dumia. Di’na balai dumia.Di’na ti’kal dumia,kwadi’ kan gepmaba.Kwaa ni’ba kwaa sakwal yidi’. Du sakwal ta’kwa sakwal yilaa kalklat yidi’ aaiwa. Nak ni’ba, agwi Agolamak yidi’,nak ni’ba Ti’gut, kugwak taabak yidi’,nak ni’ba agwaku Wewaknana ni’buk’ak yidi’. Aaiwa sevlidi’ kan gepma.

Yidi’ ta ni’ba ki’ba ti’si’blalaa ni’ba naukat ti’ka nau mi’gi’ ji’ttaa li’ka kan gepma kwaklalaa waakudi’. Kan gepma kwaklalaa waakua ni’ba

nak ni’ba wugiandi’ yika Kadi’geba li’ka. Kadi’geba li’di’ ni’n lattaa Malige Maligeak yaa ni’ba laba ak ni’na nya’ikdudi kuttaa yali’mala yaa. Kuttaa yali’mala yaa ni’nkat taakadi kat ti’kani’n. Ti’ka ni’na nyangu laba ti’di wuba ni’na gwaaldu ti’di taba agamasakkwatni’bani’n, taba kuvuk baapmavla li’kani’n taba. Kan gepmaak viyali’malaa yaa kuvuk baapmavla li’banan awa ni’na nyangu jaanka ni’ba laba lattaa di laba alnak yika ti’kadi’ laba, kan ni’na gepma. Ti’dananan du jaan ta’kwa jaane,waadi Sotmalikat.Wuki gepmaba kan ti’kani’n. Ti’ni’n yaa kan wuna gabukudi klali’kami’n. Kan gepmaba ti’ka yia ni’ba Kadi’geak yia ni’ba ni’masakwalala agwe yaa laba nak Tibumali wulaaika nak madi’k gepma gikadi’. Gidi’ waa yaa ni’bananan watta wan Kadi’ge vayiki’li’davla li’kadi’.

Ti’di’ ak kan gepma ak kan yaawun ti’wun yali’malaa yaa ti’kiyadan vaal kayak’a.Wun taba yaa balni’bunba  laba nyigi’lka kwaklalaa wun taba ti’kawun. Ti’wun wun Sotmalinyaanwun walaa yaikiya nyaan yaidavaak kayak’a, di’na avayabi’ ti’vi’kadi’ laba. Yaidavaal kayak’a.

Ak kan gepmanana yibi’t waa buli’javaal,yia klal kan gepmakat yia vaal an bukkawun.Ni’masakwal vala. Kan gepmaba ti’ka naumi’gi’ ji’tta laatdanan  Yami’lkat wulaaika tala wulaaika yika akiyavat di’kak si’ka viyadi,awa, Yami’l, yili’kadi’ waa vi’kali’ka, awa Yami’l li’kat wadi’. Yaadi’, ni’ma wega li’vwa,ni’ma vala wadi,kan gepmana ta’kwa aaiwa wulaaidi’,Yami’l laba di’ gabulaa laba ta’kwa taba ni’bida kuttaa li’di. Kuttaa li’di kan gepmani’ba wulaaidi laba wan ni’bida klalaa laba, wega kla jolakulaa wat ta’kwakat aaiwa si’kadi laba,Yami’l. Si’di wuba kan gepma laba ta’kwakat yilavikadi laba.Nyangumi’na waklalaa laba ti’danan ti’ka yilavilaa laapda agwa naumi’gi’ ji’ttaa laatdi’ waa buwa. Di’ Kadi’geak yidi’,ni’nokwi wuba ni’ba ti’lavilaa Maligeak wulaailaa ni’na nya’ikdu vakayadi ak vakaya laba,ni’nkak kuttaa taakadi laba ki’ba li’kani’n taba. Ti’ka laba ni’na nyangu li’di laba ni’na gwaatdu li’kadi. Kan gepmanana yilavaal yalavaalna yibi’t akiyali’ mi’nkat buwa.