Written by: Dr. Naomi Kipuri (For English translation see her great book: Oral Literature of the Maasai)
Oyie majo duo kalotu ena nabanji
Eitu ajo yieyio kores o Makooi
Namishiri ntaua sidain ole Ping’ua
Namishiri ilotot enyori enkop
Neimie oloing’oni kirapash lemaal oltiili
Maroroi naata emua reko nakurito oleng’ ileleru
Nkarash olkiteng’ lai oishopito buluu
Naitaa elang’ata euapata teneilepaki Ole Polos
Omanya yiook ilmeiseyieki lole Dikir
Otamoo nchoo ogela ilaramatie
Ke enaiding’a ai oolmong’i shiloin ena ana kakua?
Ayiolo ajo enkinyoti ai sidai oolmong’i shiloin
Maikodo lemekenyu eirragita te ndikir
Nanyokie ilpayiani nkutukie etoni aakes enkurma
Aininche nekwa kulie ana kakua?
Ayiolo ajo ninche nekwa olaram odo enkitipet lekiripa
Nedo ntaua meela neitoki ntaua enkiborra nanare ilorikan
Ilmutende lemeisho enkaripo eisiadu penyo
Aininche nekwa kulie ana kakua?
Ee pae oleng’oti lai oolmong’i lemepono arroi
Lemaikunja eseshata napuku ilkumok aa wuasin
Neyupuyup lolerai lemeidimu irruka are
Aininche nekua kulie ana kakua?
Nayiolo ajo ninche nekua sandikon iloing’ok e Meirurae
Naibung’a ilera enchepati nedar enkorui amanu tentim nasur
Neriku enkashe nashuroi ilepeta sapuki mouarak oo namba e sogo
Aininche nekua kulie ana kakua?
Nayiolo ajo ninche nekua napiroki nangan olkiu obo
Ijo nangan emusis eilepaki nairobi enkiyang’et
Naijorie olkiteng’ lai lenanga nakuyiana ilkurreta
Aininche nekua kulie ana kakua?
Ayiolo ajo ninche nekua olamayio lai oru nkorkorri
Naibayioki emuti iloshon naning’o olumbuani
Lembene eyiogiyiogu enoompisai nememira e Mwangi