Written by: Chebet Toper

Supai Kokwo! mmmm

Supai Kulim! mmmm

Otini kilekogh, kipetoi piich tumwoi cho chang nyoman. Anga nyo kikuro chepolaleyo kipetoi murun tipin opun..

Asis akonga, kinget, tipin aku sit kegh nyuman akulach karin lapai, keper, sirimtin kurkuris ngo atelo nyokikyil nyoman. Kinisocho tipin. Ata murun kilech kegh tukul nyoman.

Otini kirelto tum (chepolaleyo) kitor tipun kudanga akutum, kuros murun tipichai, karamach, kutor kungorekwo akutum tukul. Kitum nyoman tokukorkorio kulily koru, kusoyon poyi tipichai.

Kirelto sirim, chepolaleyo, kupa piich lapai kestonikwa. Ofini kimikipetoi tipin arengwa kungun muruno nyokaram nyoman akutor kilechi tipichai: “Apkana kepe katanyan, ato onyekwok kech” kucham lapai ompo wolo karam murunonini kitil lapai.

Kirip murunonai tipichai kupa, kupa nto kutelto kuting, kuporchi kaw nyo mitukun chorelach sach, akulo, wara chopo kechir. Kilechi apee arani, owetan orongu kechir akundo nyi. Kipa tipichai kile otini komwochi. Kirip chichai akuwo kusup kowoi chini kalis tipin loo! Wara kechir.

Kirelto kaw, tipin nyo karam. Kikurel chichai (murononai) kutor kuyek kecha. Akuto tipin kwam. Kuporchi koo nyoruyoi. Kooyin kikipar, tuw nyoman akumi kowoi cho po piich. Kimugho tipin nyoman, wolo kikar chichai kukat, kulo kewira niyat akerigh nyoman kaw ompowolo omoi piich chichete. Kuwir lenyini akupaa.

Kirelto arawit kwen kulo anuga wendo: “Kowiteghan karichan akumopustenanye”. Kilo walaka kepee ompo wolo mominye chii nyo mulo. Wolo kimaternye chepai kumula nyinde okit. Kurelto koyin orii kureto chichai

tukul, kulang chokaa nyomito koyini, kulo chichai eyiwei panyechan kapono! Porokok!

Kushelpogh ompo tarenyi, akulechi, piito koot lapayi, kwigh torenyi lenyini, otini kopit chokaa, kulo chapai ‘tii.. tii’, kulo piita kungat ‘tii.. tii.. tia’ kulim chichai akulo nyononyi pendanyu: “Kusagh chepai nyoman ndo, kulechi onyiwunan moneku” kupusto.

Kimpur chepai ngo chichai nto kusich moning, kinyarit nyoman, kikwam kitin akonga akepimcchini omisho, kisiwa tarit akonga akuporchi wolo mito piikokwa, kipulto chepai ngo monechi kumitoi taritanaye. Otiini lento chichai orupoi kepar nyoman pich cho po chepolaleyo. Kuwonyo lokoyechan.