Written by: Noonkipa Diana Kasoe
Netii apa kuna toyie, nepuo entim aitayu ilama. Nejoki entito nabo inkulie: “maaikeno nkonyek pee kidol enaitayu ilama odo”. Ore pee eidip aitayu nebol inkonyek enye naa ing’ura eitayio entito nabo ilama ojooni ake. Nenang’aa neshuko alo entim aitayu ilama oodo. Nejo aitayu olamai odo neibung enkong’u enkukuu tung’ani.
Neikilikuan enkukuu entito: “ Tenaa kenya tenaa keitaa enkitok”. Newaliki entito, ajoki: “Intaaki enkitok”. Nerik enkukuu enkitok enye ang. Neing’asia entito amu ore ina ang enye nebore ilooik oiborr loltung’ana oonya olpayian lenye anaake. Kake etiaka olpayian enkitok enye keyaki ninye enkerr ashu enkine nanya inkiri. Netoni pookira are neiu enkayioni neipoti ninye enkarna ajoo ‘KONYEK’.
Ore enaa enaiu entara enkae etaa ileleoni, basi neeku kenya sii ninye Konyek iltung’ana.
Ore nabo olong’, nelotu enkanashe ng’oto Konyek abaiki enkae. Netoni pookira are anya ilomon. Neitanap ng’oto Konyek enkanashe pee meshurie ake olchani otii empolos oeng’ata, amu ninye oshi eyeng’iyang’are Konyek oo papai lenye. Netashala ninye oleng etaa kejo pee eisho. Ore eloito neiteru asha. Neitaa ninye parmetii enadou bae natiaka ng’oto Konyek. Nekuet aked oladuo shani. Ore ake tenkiti rishata nebau enkaji oo nkukuni. Ore ninye Konyek naa enkayioni kalamas oleng.
Neirut oleng enkanashe ng’oto Konyek neiteru aosh inkulak. Nejo Konyek: “Aijo taata kewo ele shani?” Nejo maimariria nedol enkitok. Nesulunye ninye tolchani neisho neiu ilmao. Nenya nkukuni enkitok, nedumu Konyek inkayiok are kutiti ejo inkayakuj nayaaki ng’otonye metapejoki.
Basi, ore ake pee edol ng’oto Konyek nkera neyiolou ajo etaraki enkanashe neishirr oleng. Kake ore ake eyia etara ninye indero are nepej neisudoo nkayiok apik engumoto. Nelotu Konyek oo menye ang’ teipa. Neipotu Konyek nkayakuj enyana, neiteru anya eing’unyung’uny ajo eikutiti oleng. Neisikong’ papai lenye. Ejoki menya ng’otonye iltung’ana .
Nepuo inkolong’i, olarin nebulu nkayiok. Nejoki ng’oto Konyek olpayian lenye, pee erewaki ninye olkiteng opirr onya inkiri neok eilata inkolong’i kumok. Nening’ Konyek enabae neing’asia neiteru aishirr. Ejo: “Ore eyiang’ata ilo kiteng’ netaa enaibikino onkayakuj enyana”.
Eitu ninye eshilaa menye Konyek ena bae nerewaki enkitok enye olkiteng’ neyieng’. Ore pee epuo enkaji oo Konyek entim, nepuku nkayiok anya inkiri neraposho neiguran. Ore pee emutu nepuo nkayiok engumoto. Nedol Konyek orrekie loo nkera neirrashisho ejo nkayakuj enyana. Negoro oleng intoyiwuo enyana ejokini Konyek meetae likae tung’ani ojing’u emanyisho enye.
Neitoki ng’oto Konyek ajoki olapayian lenye: “Pee einyang’aki ilalema aare oremeta are narripie kewan”. Nening Konyek ena neipid, ejo meeta nchere eime nkayakuj enyana nayieu inareta. Neinyiangakini enkitok inarereta pooki.
Neyooki nabo olong, ajoki ilayiok le nkanashe pee eyesek Konyek oo menye aarr metuata. Ore ake teina olong teipa, nejo ng’oto Konyek pee ekenyu eidurri naa Konyek oo menye eiroti. Ore pee ekenyu neitupuku enkitok ilolan aeniki menye Konyek oe nkayioni enye. Neng’asuni menye Konyek, neikilikuan ajoki: “kaji eiko tenemitu ninche?” Nejo menye Konyek: “Naikonji ake natumoki”. Neyen oleng ometejo, naikonji ake nalaikino. Neitoki ayen Konyek lenye oo metaa meiwuatiwuata. Basi, neipotu ilayiok lenkanashe metasesekuana nkukuni. Ore egira aye neishirr Konyek, ejo: “Woi, atayiolo sii ake apa nkayakuj ainei, naaraki mpapa lai”. Neidurr ng’oto Konyek olmurran le nkanashe apuo enkop enye natii iltung’ana lenye. NEYIOLOUNI TAA AJO, EDOL ENKERAI ILAINYAMOK EITU EDOL MENYE!