Written by: Noonkipa Diana Kasoe
Netii apa kulo murran, neiguana nejo pee epuo enjore. Kake etii apa enkukuu nemeisho metalang’a olkeju olang’i. Ore enkarna eina kukuu naa keji Kiraget aa inchere enarepisho.
Neiguana ilmurran nejokino pee epuo pooki tenkeju nabo, naa teneinepu Kiraget te enkalo olkeju neyiolo enajoki pooki. Enking’asia sapuk ore Kiraget keton enaa antasat moruo nayiou neitalang’i olkeju, kake ore ake pee inap nemeigil adou te enkoriong.
Basi, netumo ilmurran pooki neing’uari obo laa ninye eishiaa nerik enjore amu kegol, nepi, naa keyiolo sii ilosekin lo larrabal.
Etejo ninye ore tenkaraki netaa nena pooki. Melo entumo. Nejo ilmurran, matiaki taa enarepisho teneipang’u eyieu neitalangi olkeju taanyu ole siadi, etejo sii pee epikaki olmurrani imbenek enkoitoi pee mepong eneima ilkulikae.
Neiteru ilmurran elototo ore ake pee ebaiki oreyiet neneipu Kiraget eirrugo enaa entasat moruo. Nedol ilmurran nejo toltoillo kiti: “Nakera ainei, oi entalang’aki olkeju pee ipuopuo”. Nejoki ilmurran kokoo, taanyu ole siadi..
Ore ake tenkiti rishata nelotu aladou murrani, leitu elo entumo, nebaiki olkeju. Neinepu Kiraget, nejoki: “Kokoo, kainyio?” Newaliki ajoki: “Atasayia enkerai ai intalang’aki oreyiet amu kajo eeyie olesiadi”.
Nejoki olmurrani Kiraget: “Tasioki takedo enkoriong pee ainepu ilkulikae”.
Ore Ake pee elang olkeju, nejoki olmurrani enarepisho: “Kokoo tadou tasioki pee alo”. Nekueni oleng neiteru aunoki iloisotok enkoriong olmurrani.
Neitame ninye nesai metadou kake etanya nelo olmurrani asuj orrekie loo mbenek enapita Kiraget omeinepu ilkulikae. Neishirr oleng temion nenaure netaa esumash.
Eteyiang’a ilkulikae murran olkerr, nejo maisho ninye inkiri newuapa Kiraget. Negoro ilmurran oleng. Nejo pee earr enarepisho aretu olenye. Nejoki Kiraget ninche: “Medou tenkoriong aashu teniarr olmurrani metua”.
Neitoki aunoki olmurrani iloisotok enkoriong oleng nepali metanapa. Nebik ilmurran inkuti olong’i eitu erasaki ilmang’ati lenye aaya inkishu.
Ore anaake nenya Kiraget endaa olmurrani naa ore tenelo airura neunoki iloisotok oleng’ pee meideketari, asulari. Nedoyio engolon olmurrani nesasu oleng.
Neyoki nabo olong ilmurran arasaki enkanasa aya inkishu. Nenyok olmurrani aaru inkishu kake etashala tesumash oemion. Ore inakewarie nenya Kiraget inkiri oleng’ nejo airura neideketari adoyio tenkoriong.
Nepuo ilmurran oleng’ nereu inkishu aisik aingua Kiraget.
Nepuo airragaa ilkirragarien omeshomo ang. Ore pee edol olorere lenye oladuo murrani neirut oleng neishirakini. Neliki ninye ninche enakukuu narepisho.
Ore ake ebaiki inakata neyiolou ilo murrani oltungana pooki aajo metoki olwuasa nemeishaa sii elukunya nabo eng’eno.