Written by: Dramani Dari (Winneba University)
KALAMBA
Kalamba!
Kalamba e wo anye a kre a saŋɛ.
Ekama nɛ mobe kalamba nna.
Buko kala nɛnɛ m ba
Buko malɛ ayayoo!
Kalamba maŋ kɔ ngelge
Kananɛ fo baŋ kala Nyingbunbɔrɛ
Loŋ nɛ e yɛ e yili fo.
Saaŋ gal edi nkpal eko be kanyɛ so.
Ngbere tu fo kanaŋkama
Pre kenishi n ler kumo to.
Anye be durnyaŋ ere to
Ekama nɛ mobe kelamba nna
Saaŋ muu asheŋ n deŋi chenimu
Mannɛ nyinnimu malɛ gba nna
Ta mpulo n sa kalamba
Kalamba e wɔ anye a kre a saŋɛ.
Kalamba e wɔ anye
Kalamba e wɔ anye a fili to
Anyebe kepar maŋ wɔ anyebe enɔana to
Kalamba e naa junkpar anye
Kuso nɛ anye la kabre
Kalamba e yili kumo loŋ
Kalambba maŋ kɔ ngelge
Buko be kalamba ta bumo
n yili bumo aya lɛla so
Nɛ bu nyɛ kebawɔtɔ a ji eyer
Buko malɛ, kalamba ji bumo
Nɛ kebawɔtɔ kii turata.
Kalamba lela wura pɛ awolso
A bee kii abumbuŋ nna
Mo nɛ kumulɛla e naa di
Kanyɛ ela mobe wajɛ buuso
Nɛ e bee kpesheŋ nɛ baasa bee sɔ so.
Kalamba e wɔ anye a kre a saŋɛ.
Kalamba e wɔ anye a kre a saŋɛ
Mannɛ anye e wɔ anyebe amu nɛ aya.
Kebawɔtɔ baŋ kii fo nyangraŋ
Ta m bulɔ kamɛ a yɔ a ba
Saaŋ deŋi eko eyurpi
Nkpal fobe nku ka ŋelga kufolso so.
Ta kumobe geshi n sulɔ kalamba.
Fo baa yil kiya lɛla so
Kalamba e yili fo loŋ.
Fo baa wɔ ketenteŋase to malɛ
Kelamba e ta kumobe piŋi m buu fo
An ka bee yɔ a ba ere kikɛ
Kalamba nna, mo e kɔ anye
A fiili to fanɛ vilima na.
Fo kaŋ nyɛ kuko m pɛ to
Ji m pɛto kpakpa
Fobe kalamba e baa la na.
Kalamba e nase kumo loŋ,
Kalamba lubi wura wu asheŋ
Kalamba lela wura china
Kadibi wolso be kifiito
Ku bee purwe nna m buu mo so.
Ama kalamba lubi wura bre,
Nɛ e maŋ deso gba,
Ku yɛ ku bu nna n tor mo so.