Told by: Douglas Yilayuwi (Korogu village)

Collected by: Dr. Gerd Jendraschek (Original version with translation here)

Dunyan wudubu yidi’ li’ka wa’gulakalaa yaa ti’li’javaak kak gabukatti’kawun. Ta’kwa o maatnyan o ni’ma du wudubu yidi li’ka kukka yika wa’gulakalaa yaa ti’li’javaak.

Babla dunyan kavle yidi’ yika wa’gulakalaa, gakaya yaa laba weini’bukgwaak dinaya tatta li’ka kan alabadikak kabalakkak baagla lakakiya. Dinaya lattaa giyabak alabadi yaavu kwika wugivaak yidi vi’laa wuba wan nyaamun, swaabu, wau, lawa, laandu, tawadu lattaa giyabak yaavu awaksawak kwikadi.

Yali’gi’ yali’gi’ba, mi yadi’ yaavu kwikadi. Yaavu kwika, kukkadi, kuttaa, wak kiyakiya ta’kwa o du, wugivaak kiyadi’ vi’laa, di’ si’ walai li’kiya nyaan, di’ laba bâk viyaadi’. Bâk wa’la viyaa kukka yika takwaikadi’. Takwaidi’ laba, taba nyangu wakla ki’kadi’ ta’kwa kwakladayan.

Laan kwaklalayan taba nyangu wakla wugi daba, taba kukka ki’ka li’kali’. Agivaak yili’kadi’.

Ti’di’ laba maaki’n, maaki’n ki’gisakkwat bap ti’kiyani’n, taat na’biba ti’li’di ni’nadi walagadu, gwaatdu, yaidu, ba’budu, na’biba li’li’di.

Ti’ka yaa ak li’vi’ yaa bapba yaali’di. Yali’ka yaa kak ni’n nyangu ni’naya li’ka na’bi, ni’naya li’ka jibula kak, li’ laba nadinyaba mi’na li’li’kani’n taba. Nadinya ki’ta dumi kyeli taba-vli kyeli ki’ta wupmâ ti’li’kani’n, nadinyaba mi’na maaki’n ti’li’kani’n.

Ti’ka yika, adi nadinya yika gi’li’di’, giyabak, taba gu yaakukadi. Gu yaakuka mava yakika wapu viyaa agivaak yili’di.

Yili’javaak’a taat ni’nadi gwaatdu, ba’budu, walagadu ti’jan, yika nu viyali’di, kula ichakuli’di.

Adaba kan kiya yadi’? Ada nyaana kuklasa, ada nyaana ki’pmâ yia wala li’ka, yali’gi’na nyaan, latta li’ka laba kula kwili’di’.

Kula kwili’di’ wugi nuba yika viyadi li’ka wuba vi’lala vi’li’di. Nu yika vi’kka kiya nunyiga pasi’ka kukka wagla waa, kukka kiya wan daabuk wuba kukka, avawudubu wuba susakuli’di. Avawudubu wuba susakudi, taba daabuk kukka susakuka kukka gi’li’laa nunyiga viya kukka yaali’di. Yaa giyabak wata giyabak. Wuba laba gaan taba ka’ik glaadi.

Ka’ik glalaa, gabi, wakwaika yika giyabak, mi yaadi’.

Mikudi yadi’ wuba wapu viyalaa wuba mava ya’kidi, taba tilutilu waa dalaa laba aaiwa wuba maaki’ngaai wuba li’ka ta’kwa, maatnyan, du aaiwa gu dalaa taba gu yaaku saakukadi, laba wudubu yaaku saakukadi, avawudubu. Taba yaaku saakuka yika, taba-nak pa’k yidi’ gi’li’ka, taba gaai yaadi.

Yika gaai wattaa taba ki’ki’vaak kukkadi. Ki’ki’vaak kukka ki’ka giyabak sali’sali’jaagwi sali’ka taba kutta laba geko klokukadi. Geko kuttaa klokudi, waaki’n waatdi’ yika taakadi mi’na kukka ki’di. Waaki’n waatdi’ agiyabak, di’na maaki’n, di’na yoli, taba gi’li’kadi’.

Di ak taat ti’jan, ni’nadi yaaidu, ba’budu, walagadu ti’jan, wan maaki’nge ti’li’jan, ki’bi vi’kka, baani vi’kka, naami’i vi’kka, wugivaak ti’li’di. Mi’nida’ma maaji’ ichelika, mi’dama ki’pma kuka glaa wugivaak ti’li’di. Gabi glalaa gla’bu glaali’di. Glaa wugivaak ti’li’di, maaki’nge ko ana li’li’di. Di’kak ti’davaak, di’na du agi’nkak yalavi’kka, wugivaak. Ki’ka ki’sa yaa ti’li’davaakkak yalavi’kka, di’na jukuji’vwa kukka, nyimei nyageikak vi’ka, yaa ti’davaakkak wugivaak an dukak.

Ta’kwakak wugivaak si’ki’k, wupmâ ti’li’di, ti’jankak ti’ka bapba mi’na wali’di. Kan ni’n nyangu ni’n, ka’i laba, wukkivaappla ana yikani’n taba, nadinyaba mi’na taba kwikani’n. Agiandi’ buk’wa, ki’ta dumi kyeli taba-vli kyeli ki’ta adi nadinyaba mi’na ti’ka ko vi’tti’tti’kka wupmâ kwika maaki’n kwaklali’kadi.

Giyabak. Apmaglai nadinya.