Told by: Sofia Yimbumbi (Korogu village)

Collected by: Dr. Gerd Jendraschek (Original version with translation here)

Ta’kwa ni’na kutdakak kan bupmekawun. Gepmajulaba kan sakba kavun kukka sugwa laaka ki’li’ni’n. Walini’bana sugwa yadi’ mi’na wugi gepmajulaba kavun kukka ki’li’ni’n.

Avi’sakjula ni’man kawukjula, maak jula anadi’, ni’ma julaba, Avi’sakjulaba kavun kukka jaagi’k kukka, wupmâ kukka ki’li’di. Naami’i li’li’vi’ kukka, akwi kawika, wugi naami’iba ki’ki’da wuladi’ ti’ka kukka kiya ki’ka ki’sa li’li’ni’n. Taat ti’li’nan.

Kan taba ak naami’i kodokwadada kan taba gi’li’li’kadi’, kan ti’ka saunbagi’ni’ba kiya julaba ki’ka ki’sa li’ka taba julabaani laba aaiwa kwaklakadi, kwaklalaa laba walini’bana julaba kukka ki’ka li’kadi. Walini’bana julaba mi’na kavun kukka ki’kadi. Kan gepmajula laba gi’li’kadi’. Gepmajula ana li’kadi’.

Ti’di’ kan naami’i, naami’iba ki’kala ni’ba laba gi’li’di’. Kan bablaklai laakka maatnyangu ki’gi julaba mi’na kutta ki’ka li’kadi, kaami kukka ki’ka ki’sali’kadi.

Ni’na jula, ni’na naami’i, wan kukka ki’ka ki’sa ti’li’navaak, taak ak kwavanaami o nyakage li’li’vi’naami, wan si’si’gi’ akwi kukka, dadagi’ maagi’n kukka ki’li’javaak taba kwaklakadi. Kwaklalaa laba saunbagi’ni’bana jula mi’na li’kadi’ kan, taak kukka ki’ka li’navaak kan nyangudu ana kukka ki’kadi.

Taat ti’na jibula, naami’iba kukka ki’ka, wan ti’ka baan va, li’li’vi’ kukka, akwi kawika kukka ki’ka ki’sali’na jibula laba gi’li’kadi’. Nyangu laba madi’t jula yadi’ mi’na, wugi julaba kukka ki’ka ki’sali’kadi.

Kan taba dino dinan kukka ki’ka ki’sali’navaak taba kwaklalaa, laba walini’bana julaba li’jan, gi’ni naami’ina vaak, kavun julana vaak ana kukkiyadi.

Agiyabak.