Told by: Pidelma Mondo (Korogu village)

Collected by: Dr. Gerd Jendraschek (Original version with translation here)

Wiji’bulakwa okwi gepmalakwa li’bi’k, gepmaba ti’kali’ka gaan gepmalakwa okwi li’la nyaan okwi sak yivakat ti’bi’k. Ti’bi’t ti’ka wak wiji’bulakwa jali’kavaba yalaa wukka li’li’.

Wukka li’ka yalaa bi’kkak nyinagak kutti’. Yakwabi’li’, laba keibavaak yili’kadi’, yikatti’kani’n kavun kupmaak wali’. Walaa yibi’k. Yilaa yika, kavun kukka li’ka, wak gepmalakwana nyaankak wiji’bulakwa kuttaa li’ka, yika mi agwaba ti’li’. Ti’li’ li’ka wak gepmalakwa kavun kukka yili’li’.

Yika li’ka wak wiji’bulakwa laba wat nyaankak taba vatnyalaa li’ka, taak li’la si’ttaba ti’kiyaa ki’li’, gi’ni li’la si’pmaan ti’kiyaa ki’li’. Ki’laa li’la naabu, mi’nisi’k si’vunkuka klali’. Si’vunkuka klalaa gi’ni li’la di’ki’bi ki’li’. Li’la di’ki’bi ki’laa li’la madi’k bagi’ ali’pklai waa ki’li’.

Ak giyabak.