Iatmul – The School

Told by: Sofia Yimbumbi (Korogu village)

Collected by: Dr. Gerd Jendraschek (Original version with translation here)

 

Taak agwi Abukiba li’ka yaa Kabi’pmali waatni’n. Walibajwe ni’nkak sule buchelivakak yaa, ni’nkak sulekudi bupmakak wa wadi’. Kan yaa Walibajwe wadi’ suleba li’ni’n. Suleba kan saunbagi’ni’bana kudi ana gabuli’ni’n, ki’gi li’ka gi’pbagi’ni’ba, ni’nkak ki’gi walikudi buchelidi. Walikudi buchelidi, wugi walikudiba gabuka, kan sulekak yili’ni’n.

Mi yadi’ mi’na, ayiguli’ agwi sulekat gukkak sule taba buchelikatti’kadi’. Sule buchelidi mi’na klaatti’kaguk, waa li’di ni’nkak. Waa li’di ni’nkak, suleba li’ka kan ti’ka kudi laba ali’pma kladi, kan ti’ka walikudi taba klaka, wuba walikudi gabukadi.

Kan ni’na nya’ikdu ana walikudi gabuli’di. Tugwegwan yikali’di, walikudi gabulapman. Ti’kali’ka yaa giyabak, Walibajwe yaa kan ni’nkak walikudi buchelidi’ giyabak, wukka, awa agian walikudi kan wadi, waka li’di. Tugwegwan yikali’di.

kak kiyalaa ni’bakak jabukavaba jabukavaba vaaguka li’di, ana wan wa’gulakakava yika wa’gu lakaka wupmâ ana li’di, kiyalaa ni’bakak di tugwegwan yika gekavaba jabukavaba wa’gulakaka, ja’gunau ki’ka wupmâ li’di.

Ti’di giyabak German yadi giyabak wudi German yaa giyabak kan ni’nkak ki’pmâ ali’guli’ wadi.

Abudiba yaa saunbagi’ni’ba gaai gilaa ni’nkak vi’ka li’di, Abudinana ji’vwa kutti’di. Polismen yaa kan gepma viyaa, ki’pmâ ali’guli’, kavle savle ke li’gwa, waa wadi. Wan walikudi wukkalaa ni’ba, ki’givaakkak yaadi’, waa butdi. Polismen kwia sulekak yilaa yaa butdi, wukka awa ki’givaak’a wali’di, kan ni’nkak an Walibajwe sule lakadi’.

Sule lakadi’ mi’na wuba suleba li’ka kan walikudi ki’giandi’, kan walikudi waa gabuka kwavak savatnavaak wukka, kan walikudina vaak wukkalaa ni’ba taba aaiwa gi’li’ gi’li’kadi’. Wan ki’taba wuna suleba li’a ni’ba, ki’tavaak laak’wa ni’ba, kasaka yaa ti’wa ni’ba, taba aaiwa gi’li’di, wun ki’ta li’kawun. Ki’ta li’ka kan gabukawun.

Kan nyaana (John Bonjuina) nyimei klalaa, taba wan ni’nkak buchelili’davaak kwakladi’, Samewan yaa kuk’a ni’nkak. Samewan kuttaa li’di’, Samewanna suleba li’li’ni’n. Ti’ka wan sule yika gi’li’di’, Samewan agiyabak ak kwakladi’ mi’na, ni’nkak Mobowadi’na yaa kuk’a.

Ni’nkak kan ti’ka sulena vaak kava kava Samewan okwi Walibajwe kalibi’k gepma gepma. Gepma gepma kalibi’k mi’na, kan missionarynana sule ki’gian wa wadi. Waka missionaryna nyaagi’k wukka gepma gepma agula Maligwat wuguvali Sabli Aivom ali’pma. Wugi Marienberg suleba li’a ni’badi yaa klaa, ni’na gepmaba li’a nyangu kladi laba.

Walikudi laba ni’man yidi’ ti’ni’n, ki’di nyangukak kan saunbagi’ni’bana kudi yadi’, kan gepmakudi ana gabuli’kadi, giyabak, saunbagi’ni’bana kudiba mi’na laba gabuka li’kadi. Ki’di maatnyangu laba aaiwa ki’gi walikudiba gabukadi, walini’bana kudiba gabuka taba kwavak savak gepmakudi gabudi ana wukkiyami’n. Kan gepma, ki’di maatnyangu laba wugi kudiba li’kadi.

Ak taba kugula sule laatdi’, kan English laba klalaa, taba ki’di maatnyangu laba Englishba li’kadi. Ni’na gepmakudi taba gi’li’li’kadi’. Gi’li’di’ laba kan ti’kani’n.

This entry was posted in Iatmul and tagged , , . Bookmark the permalink.

Comments are closed.