Told by:Sofia Yimbumbi (Korogu village)
Collected by: Dr. Gerd Jendraschek (Original version with translation here)
Kan naabina vaakba bupmekawun. Kan ni’na nya’ikdu kan naabina vaak waa ana li’di. Di di’maiba kuttaa li’di, sabiyaguna bap si’la ki’ta taba yikadi, kan taba nyakagea.
Walaa li’ka, nyakagena nau ki’ki’da, li’li’vi’ kukka, akwi kawika, wan dadagi’ kan takwei wugula takweika, baan vaka kukka ki’ka, wan ti’ka si’si’gi’ viyaa, maagi’n kukka, kaula sugwa taaka, wupmâ kutti’di, nyakage kukka ki’li’di.
Kukka ki’ka, ni’na nya’ikdu yika nya’in kalak si’ka kuli’di nyakage. Nyakage nya’in kalak si’ka kuka abukava kutti’di. Kutti’di ti’ka ya balasai watti’di’, taba di’mai waakkak ti’kadi’.
Kan di’maiba vi’katti’kani’n, ni’na di’maia yaa ti’ka walaa, kan bala saili’di’ wan taba nya’in kalak vavakkak ti’di’. Ki’tti’tti’di’ kan taba nya’in kalak taba ti’ki’k ti’ka laba daam si’kadi’ kukka ki’ka ti’kani’n.
Walaa wugi nya’in kalak si’ka kuja daa kukka ki’vaakkak yili’di, taba Avi’sakna da yaali’di’, taba madi’tnau, madi’k ki’ki’da yaali’di’.
Gubwi nau gubwi ki’ki’da waa kukka ki’li’di yaa sabiyagu tevaak kukka, kwavanami li’kulaika, wan kavun kukka ki’ka, Avi’sakna da wupmâ kukka ki’li’di.
Kukka ki’ka yika kan taba madi’t di’maiba li’kani’n,kan taba di’mai waatdi’ wali’ni’n, kan taba madi’t di’maia, akkwi di’mai gi’li’dayan, kat di’mai taba ti’na waa kukka ki’ka ki’sali’ni’n.
Wak sabiyagu daalavaakba waa vi’ka ki’ka ki’sa nyakage wattavaakba vi’ka kan taba kak nyagagea. Kan sabiyagu waa ki’ka ki’sali’di. Wan naabina vaakkak ana vi’kali’di, ko li’di. Kan bapna vaakkak, ki’kki bap’ak waa ana li’di, ki’kki naabiak waa ana li’di. Ko li’ka, tugwegwan yika kukka ki’ka ki’sali’di.
Madi’pmi’na ki’kida yadi’, kan ni’na sakwa’guna daa taba nak sak nak wa’guak yikadi’. Taba madi’tnau madi’k ki’ki’da yaawaa wupmâ wali’di waka wuba sabiyagu daadi’.
Ti’ka yika nyakage waatdi’, kan taba tugwegwan nau tugwegwan ki’ki’da waa kukka, li’li’vi’ kukka, akwi kawika ki’ka li’di, nyakage, sabiyagu yika gi’li’di’ mi’na.
Ak giyabak gabuwa.