Told by: Moronga Tanago and Dahm |I!ae Ju|’hoansi translation by Dahm |I!ae
With special thanks to Marlene Sullivan Winberg and Willemien le Roux (For English translation see the great book: The STORYTELLER, Folktales from the Kalahari desert and the Okavango River in Botswana).
Goaq kxaice ‡ara tsaqn !xoana ||kae. Sa koh area khoe, te ka cin tih koh gea ju n|ui khoea ko ju tsaqn sa he khoea. G|uih |’an koh kxae dshausa o n!ani , te sa n|uia, o ha ‡ara, !’Hai ||’a koara xarese dshau n|’ee.
G|uih, ye koh kxae dshau n!ani, koh |oa ||au ||ae !’hai khama ha te koh ku ||’ae ‡oa ha ko g||akhoe, ko ha dshausi g|a’a !kasi. Te !’hai koh |oa are tca g|uih ku koh ||aea.
G|uih ||’a ha dshausi koh cete ku koh ||aea !’hai ko ||’a tcaa, ka ku ko, du tca ke he, du tca ke he , gu, !ae, a’an !’hai koe ||’ae kxui, tcao ha te ka ‡’aun n!aroh ha si ko tcin|ui.
Te ha !oa g|uih ||’a ha dshausi te ko, “ I re !’han tcao g|uih te o mi dongi? Mi are ‡xuru ha ko ka etsa o tzisi ye ku !aqe !ha”.
Dshausi waqnsi |oa ‡om tca ha n||a te sin zain |xoa si n|aisi. Te !’hai kua ko; “ mi ku !oa I ko tca mi ku n||a, n|ang I sin kho n|ang se, mi ku ‡xurua I !’hoan ko ||ama tzi ka tsia khun ke he”.
“ A’an !’hai, a ku djaa, tca a sin |oa ku du.” Te ko din n!ang, si ko, g|uih te ||am o ||’aiha te |oa o a o !’hai.
Te !’hai |oa mani si. Te sin g‡om te g|e g!a’ama ua g|ui!ka. Te ka ha ||kae |xoa g|uih ko !aqe|ho, !’hai kua !aoa ha |’ee ko kxa|ho, te ||hai tuia ya !omsi ko maq n!ang, te n‡ai |kae ha |’ee.
Te ka g|uih ku ho !’hai ko tca ha koh cua, oka ha kua tsia ha khoea.
“Tih re o ha tce, !’hai?”
!’Hai sin n‡ai ‡’uru ha |’ee, te |oa kokxui ||’a g|uih ho tcao ha o, !’hai , te ho ha |’ee te ku |kae.
Te g|uih tsa’a |’an !’hai ha ‡ara ko khui te kua ||’ae tcao ha te ka ko tini ua ha ko tju|ho, te ka ha ku ‡’ang tca ha ku koh tini ua ha oka ka tih. Te ha ‡’ang n||hoo te din n!ang ha ko; “ wee, mi ku maq a ka tini ua a ko tju|ho.” Te g|uih kua cu te !’hai kua N!’om ‡xuru ha !’o. Te !’hai zoma ko ka ha ‡’ang tca ha kota g|uih ||’adshausa o n!ani koh n||a.
Ka ha koe ‡’ang kxui oka g|uih maq ha te sa cu te ku !au g!ai. |Am n|a koh cete ho ha |’ee te khui, te !’hai g‡ara g|uih te ko n|ang ha |’an ha ko !aihn ||’hau n|ang ha dua ha |’ee ko zoqazoqa, te g|uih kua koq’e te !’hai ||ae !’ua !aihn ||’hau.