Written by: Dr. Naomi Kipuri  (For English translation see her great book: Oral Literature of the Maasai)

Netii apa, netii ena ng’atuny o esidai. Neisho nabo kata aairiamaki. Ore toonkuti olong’i nenya nkera eng’atuny ilpepedo. Nelo olng’atuny aikonyaa nkera esidai neitu ninche enya ilpepedo. Nelau esidai enias amu meitieu olng’atuny. Niany inkera eng’atuny, neing’uari mewaita olameyu. Nerik ninye eng’atuny inkera esidai nelo.

Neton esidai aisinanuo. Neton adamisho. Nedumunye ake nelo aishiru nkulie ng’uesi. Naa keriku ake eng’ues nariku nejo ineng’atuny inkuoo. Neruk ing’uesi muj nelau enagol kutuk najo inesidai inkuoo. Ina taa peyie eiposha esidai o meeu atum karbobo.

Neinosaki taa esidai karbobo enetaasa olng’atuny. Ore ake peyie ening’ karbobo nejoki esidai, “Shomo peyie iitu metabaiki.” Nelo esidai. Nedumunye karbobo alo aing’oru olkiu oodo oota inkutukie are. Ore peyie eitu esidai anaa metabaiki nejoki, “Shomo eneje taleenu olkiu oodo oudo empolos toriku ng’uesi pooki peyie kiponu aiguena.

Ore peyie ebau enkolong’ enkiguena neiturrur esidai ing’uesi pooki nerik olapa kiu oodo oota inkumot are. Neiguenae taa. Naa ore eng’ues pooki nainyiototo nejo “ineng’atuny inkuoo,” amu keure pooki eng’atuny. Ore peyie ebau enkata e karbobo nedumunye aitashe nejo: “Iishutua?” nejo nkulie, “Ee.” Nejo, “Ore taa amu kara dorrop tenaitashe tempolo intae nimining’ining’i enajo, enchooki matakedo ele kiu peyie alo sii nanu aliki ntae inainei.” Nejo nkulie ng’uesi, “Ai etisipa, etisipa.” Naa keisho ake eng’atuny peyie einyiototo eng’ues naba anaa enainyiototo neikurrukur ejo peyie eiture ing’uesi peyie mepuku aajo inesidai inkuoo. Neureishoyu naa ng’uesi pooki.

Nejo karbobo: “Ore taa, kegol kuna baa. Amaa, keetae eniopir naiu enepapit?” Nejo olkiu pooki, “A-ah!” “keetae enepapit naiu eniopir?” Neji, “A-ah!” Neitadoyio karbobo oltau, nejo, “Ore naa, musi indaai amu ine sidai inkuoo!” Nejo ninye nyul! adoiki enaduo kumoto. Nejo sii ninye eng’atuny tiam! ajo aitiamaki karbobo aibung’ olgos. Nelo ninye karbobo aipang’u tenadou nkae kumot nelo.Neton eng’atuny arrip enaduo kumoto ejo keimu karbobo omeewa olameyu. Ore peyie eye nelotu ninye karbobo aitamie eng’atuny enkuram oloikulu etua apa toonkaun. Neiting’ ina atini ai eba neijia. Niaku ina oshi peyie eotae endung’et erashe najo, “Meitemenayu esidai ilopir lenyenak.”