Written by: Dr. Naomi Kipuri  (For English translation see her great book: Oral Literature of the Maasai)

Ore apa tenkiterunoto nemeetae apa Keeya. Inji oshi eikununye keeya enkop.

Eetae apa oltung’ani oji Leeyio laa ninye apa eiterie Naiteru-kop enkop. Nejoki apa Naiteru-kop Leeyio: “Nchoo ake peyie eye oltung’ani iwa auluo nilo ajo ‘Apa tua nilotie, tung’ani tua niitu’. Tenijo neijia nepok ilo tung’ani otua.”

Nelusoo ilapaitin kumok meetae oltung’ani otua. Ore kenya peyie elo enkerai e likae marei aye neipoti Leeyio meshomo aiturra. Neya ake Leeyio enkerai auluo neidang’ ajo: “Apa tua niitu tung’ani tua nilotie.” Nelotie oltung’ani ina.

Ore peyie elusoo ilkuti apaitin nelaiy enkerai e Leeyio. Neya menye ong’ata nejo: “Apa tua nilotie, tung’ani tua niitu”. Nening’ Naiteru-kop. Nejoki: “Meekure ebaiki amu enotoki apa keeya peyie eye enkerai elde marei.” Ine taa oshi eimua keeya. Ina paa teneye oltung’ani nelotie kake tenemuta olapa neitu anaake menyaakini aashil.