Written by: Dr. Naomi Kipuri (For English translation see her great book: Oral Literature of the Maasai)
Etii apa entasat nemeeta olmoruo nemeeta sii nkera. Ninye ake openy tenkaji enye. Nenya apa eliyio oleng’ nelau enias. Nejo nabo olong’, “Kadumunye taata alo oloiboni aing’uraa tenaa keeta enaitaas. Nedumunye alo”
Ore peyie ebaya enetii oloiboni nejoki: “Oloiboni kitok, osina laayaua enitii amu kayiolo ajo iyie ake likindim atooru ele sina.” Neing’or ake oloiboni nejoki, “Tomononi, tolikioki osina likitimitua.” Neinosaki entasat oloiboni osina oota nejoki, “Ataa kitok neme olmoruo aata, neme nkera, naateekua eliyio.” Neikilikuan oloiboni ajoki, “Kolmoruo iyieu anaa nkera?” Nejoki entasat, “Mayieu olmoruo nkera naaji ayieu.” Nejoki oloiboni: “Shomo ang’ ng’oru motioo tasotoki ilng’abolo ning’uaa tiaji nilo iyie arere nkejek tiauluo.” Ore peyie errinyo entomononi ang’ nias pooki natiaaka oloiboni. Neiput ake ilng’abolo motiook neipang’ alo nkang’itie.
Ore peyie elotu ang’ teipa nening’oo iltung’ana erany nejo, “Shye, anaijo toi ening’o nkera erany tenkang’ ming’ani!” Nejo tabaiki nekwetiki nkuititi kera ejo “Hooyia nini, hooyia nini!” Nejo nkuna nji ilmurran eduaaya erany tolosinko. Nejo tabaiki aji eisujaki duo pooki toki neori enkaji, neitobiri pooki toki. Nelo osina enelakua. Neshipayu entomononi oleng’ . Nebik ilapaitin kumok onkera enyena tenchipai.
Ore nabo olong’ neinepu nkera oolasho eimalimal neimina lasho. Ore inaatii ang’ niara niaku keishiraa pooki nemias esiaai tenaduo ang’. Negoro ake entasat neisikong’ nkera nejoki: “Kainyioo kuna kiyiotin olng’aboli!” Neitirring’a nkera. Nianyu ake meshomo ng’otonye nkang’itie neiturruro pooki nerrinyo olapa shani oing’uaa. Niaku ilng’anayio lolng’aboli anaa apa ake.
Oo naa peyie ejo entomononi tushukunye neinepu enkang’ nailiyio. Neishir oleng’. Nedumunye nerrinyo olapa oiboni. Nejoki: “Kaji kinkuna, aikinyiaaka aoru nkera naatoorutuo oshi eliyio!” Nejo oloiboni ainining’u ilomon lentasat neyiolou ajo ninye naitarruoyie. Nejoki: “Tomononi meekure eeta enaidim aitaasa.” Nejoki entomononi, “Amaa sa tenalo aing’oru tolapa ng’aboli ijo katum?” Nejoki oloiboni: “Shomo tetema amu etejoki apa ‘mme nkidimat epuoyieki, nyuaat.’”
Neing’ua ake entasat enkang’ oloiboni nelo aya inapa motiook nerrinyo olapa ng’aboli. Neked olchani. Nelo ntayu olng’anayio nepoku ilng’anayio pooki nkonyek aing’or entasat. Neirut entasat oleng’. Nelaikino atadou toladuo shani. Ore peyie emutu neponunui aadol neitadouni. Nepeji olkimojino etoonye duo enkutuk tolkirutoto. Eitu aikata eito aing’oru inapa kera naaisikong’a ajo ‘nkiyioitin olng’aboli.