Maasai – Oltome o Enkitejo (The elephant and the Hare)

Written by: Dr. Naomi Kipuri  (For English translation see her great book: Oral Literature of the Maasai)

 

Netii apa, netii kulo tomia. Neyoki aapuo erutore aarutu enaisho naya enkang’ enkaputi. Ore epuoito nejo matalang’ oreyiet enkitejo. Nejoki enkitejo obo le sidai, “Mpapa intalang’aki ele riyiet.” Nejoki oltome, “ Takedoki naa enkoriong’.” Neked enkitejo enkoriong’ oltome. Nedol Naikitejo ilbenia oobore enaisho oolotorok tenkoriong’ oladuo tome.Neiteru anya ena aisho; Ore peyie emut tolbene obo nejoki ele tome, “Mpapa nchooki sii iyie osoit laiguranie.” Neisho oltome. Neitadoiki oladuo bene lemeekure etii toki. Neitoki anya enaisho natii olikae bene. Ore ake peyie emut nejoki oltome, “Mpapa nchooki taa ake yie likae soit lanang’ie enda motonyi amu etadoyie oladoi.” Neisho oltome. Neton taa aiko neijia aomonu isoito oonang’ie motonye nelej oltome ajoki imotonyi enang’ie omeiputa isoito ilbenia nenyorriki aa isoito ake ootii. Nejoki ilkulikae, “ Uui, etumuta enkitejo inaishi ainei!” Nejo kinkonji aatalisho neduaya enkitejo elo teidie. Nemir aajo mainepu. Nejo mbung’a nepaashare enkitejo nejing’ enkumoto. Neitoki ake ajo mbung’a neibung’ enkidong’oe neidoso,neibung’ enkeju. Nejoki enkitejo, “ Hae oloibung’a entonai ejo nanu!” Neing’ueiki, neng’amaa entonai. Nejo enkitejo, “ Oi mpapa kitigila enkeju!” Ore eerare oltome entonai ayietu ejo kenkeju enkitejo nepurjukare ninye enkitejo apang’ alo. Naidosu oltome entonai nenyorriki naa mme enkeju enkitejo. Ore kiti neduaya enkitejo elo eid inkeek. Nemir ajo ainepu.

Nekwet enkitejo nelo ainepu ainepu ilchekuti. Nejoki, “ Loshekuti kulo, idolitata elde tome okwetu tende, esika amu ntae elotu aar.” Neisardak ilchekuti aaim inkaloli pooki. Ore peyie eduaya oltome ilchekuti ekwet nejo tenaa kenkitejo emirta. Nemir omeinepu embata neikilikuan ajoki, “Loshekuti kulo, itadua ake enkitejo naidoso kidong’oe naima ene?” Nejoki ilchekuti, “ Itapaashare eima idia ae alo.” Ore emirta oltome ilchekuti netum ninye naikitejo oloigute nerrinyo alo idia alo duo naing’ua.

Netwet taa ake naikitejo o meshomo ainepu intasati naaripisho tiauluo. Nejoki, “ Nooyieyio kuna naaripisho, idolitata lido tome ekwetu teidie enyeito amu intae elotu aar.” Neinyiototo intasati aing’ua eripare nesar inkajijik. Ore peyie einepu oltome, nejoki, “Nantomonok kuna, koree ake enkitejo naidoso kitong’oe naima ene?” Nejoki entasat, “Neidia naima idie.”

Neina enkitejo, nekwet nelo ainepu inkoiliin naadaa. Nejoki, “ Nooiliin kuna, esika amu intae elotu lido tome aar.” Neidiyiadiy inkoilii. Neipirri aapuo. Neinepu oltome nejoki, “ Nooiliin kuna, itadua ake enkitejo naidoso kidong’oe naima ene?” Neitaa inkoiliin oltome metusuja enkitejo.

Neina naikitejo, nelo ainepu inkulie kitejon nejoki, “Naikitejon kuna, idolitata elde tome okwetu tende? Endoso pooki inkidong’o amu inkitejon nemeidoso kidong’o elotu aing’oru.” Neidos induo kitejon pooki inkidong’o. Ore ake peyie eidos nebau oltome. Neikilikuan ajoki, “Naikitejon kuna, itadua ake enkitejo naidoso kidong’oe naime ene?” Nejoki inkitejon, “ Emidol ajo keidoso iyiook pooki?” Neikonji inkitejon pooki aitodol oltome inkidong’o amu kejo ninche anaa kembae sidai etaasa metaa meekure ear oltome. Neisirng’ ang’a oltome. Nejo ng’ura kuna kitejon nedol ajo keidoso pooki inkidong’o neyiolou ajo eeseka enkitejo. Nelau oltome enkitejo naar o enapal anaa kenyaanyuk pooki. Neishunye enkatini eba neijiia.

This entry was posted in Maasai, Maasai and tagged , , , , , , . Bookmark the permalink.

Comments are closed.