Written by: Dr. Naomi Kipuri (For English translation see her great book: Oral Literature of the Maasai)
Emuto kinyamal esupat
Esupat nairi nkukurto
Neiri nosarge o ne kule
Etaekuo enkaji ang’ enaleng’
Etaekutuo kule neyeku olker
Enkolong’ natumi nosim ai
Netumi neng’ida olmarei lang’
Neng’ida enainosa o enaele
Neng’ida ng’otonye enoto osim
Neng’ida ilpayiani ear intoto
Enkai ai miking’orie olmoruo
Miking’orie olekekuno moitie
Oloshomo rukoro o njing’eta
Nelotu etang’asa eliyio enkaji ai
Etang’asa nchasho oltiren o nerruat
Miking’orie man-enkop loltarin
Olapa oidipie ng’otonye ntaleng’o
Enkiponu lomon neiperno
Nejoki pa-ntare, pa-supen
Pa-supen lai akaji ade ijing’?
Ekalo nanu enkaji enoshi ake
Enkaji emugie nasioki enkong’u
Enkaji e kishirtit olchoni
Nemeeta enkurrukur naitiamie
Enkaji e kilulung’a olepet
Kilulung’a oloyeku oleteipa
Enkai ai nasai aatasayia
Enkai irrugu nkonyek abori
Enkai nimintayu ntabo
Aitayu ilmurran lang’ le polos
Ileme layiok neme selenken
Impurpurri meidimari nchoki
Nchoo ntomonok inkera
Nchoo pooki miiliar
Metii enamakua itejo aisho
Metii enkiberie enkoshoke
Neleku endia nainosa enenye openy
Neisho ina kinguranie nkera
Nedoiki naidaikie enkusaka
Inaatejo erropil iltaikan
Inaatejo emelok intare
Nejo olmuriang’ peyie ejo olkuluk
Ndiain naayanyit ilewa
Naajokini tinyiku nejo ayia
Tinyiku mainosie enkiyio enkop
Maitainyie enchonkorro nosim ai
Ntumain nikitejo saing’ang’ie
Naing’ang’ie olkipoket kishomi
Neing’ang’ie ilmosorin ilmoruak
Neng’ang’ie ilpayiani ilchekuti
Ilili niropil nosim ai
Ilili mikinyim ing’oruo
Ilmurran looltaikan ake onyim
Nimikinyim sii lelo enadede
Patim ai nemeiro nairorie
Tenkae kata mairoro tenkaji ang’
Airo mainosa lomon supati
Sidan lang’ lemetii enkurrarre.