Collected by: Don Sybertz,   Scanned by: Cephas Yao Agbemenu     Edited by: Fr. Zakaria Kashinje OSA

With special thanks to Rev Joe Healey (African proverbs,Sayings and stories)

Kale ya makale, muna Shimba akabhabhulaga pye abhanmhala bha ng’wigunguli. Namhala umo duhu atabhulagilwe. Nang’hwe witanagwa namhala Sayayi. Nguno wali wibhisa kihamo na bhana bhakwe. Muna Shimba akabhona giki, abhanamhala bhatina solobho kuliwei. Na bhakasaga bhayanda duhu.

Lushiku lumo muna Shimba wali alalile. Aliyo ukunu waliasamile, liza liyoka lingila munomo gwakwe. Likanza lyenilo yutabhanya muna Shimba akakoya no. Akagayiwa ugogwita. Wakanoga ubhabhilinga pye abhayanda ubhawila, “Bhabehi ningililagwa Nzoka, mdulile kunambilija?”

Bhayanda bhunshokeja, “Ayise tutuduja umhayo gweneyu. Alinguno twakulile haha no, tukukumana kinahe umhayo gwenuyo?” Ng’wana kang’wa Lung’wando, ung’wila muna Shimba, “Aliho ubhabha, hamo akuhebya ukukupija. Aliyo ngilo umulage, nguno ubhebhe ukabhabhulagaga abhanamhala.” Muna Shimba akayomba, “Nduhu unene natumulaga.”

Ng’wana wa Lung’wando akaja kuli yise ukang’wila. Namhala Lung’wando akaja aliyo ukunu alina Ngoso. Aha wegela wimila kule nguno ya kung’ogoha muna Shimba. Namhala ubhuja, “Ulu nalakupije andi nunene ukunibhulaga alinguno ubhadalahile abhanamhala.”

Hambunu muna Shimba uhaya, “Nduhu gete natukwita kinhu.” Haho Lung’wando ung’wegela umuna Shimba, kunu alina Ngoso. Uyugakanda akagoso, nose kuyulila, Twi! Twi! Twi! Kagoso aho kalila muna Nzoka wigwa, ufuma uyomba, “Lelo nyama.”

Haho na haho muna Nzoka wandya kumpeja umuna Ngoso. Akashika mpaga kule no. Muna Shimba aha wapila, akafunya bhulumbi kuli namhala Lung’wando.

Kwinga lushiku lwenulo, muna Shimba oya kubhadalaha nu kubhabhulaga abhanamhala. Uyomba, “Gashina abhanamhala bhalina masala. Bhayanda bhatubhashigila abhanamhala.