Told by: Ronny Kaviagu (Korogu Village)

Collected by: Dr. Gerd Jendraschek (Original version with translation here)

Wuna ni’ba vaalalapman ti’di’. Yika taak mi yika vi’laa viya iselikawun. Nak nadinya yika mi vi’kkawun. Vi’k’wun yika dadi’ wuba yabai viya iselilaa tolaa vi’kawun, mikak, si’vla mia o taabi’ mia. Vi’k’wan taabi’ vi’li’li’k klavla li’kadi’.

Wuba taba taabi’ vi’li’li’k vi’tti’kkawun. An taba momi agwami klaawun.

Ak bablana ji’vwa, ki’nya taba daan si’balakulaa taba povu belikawun.

Povu belilaa taba kegwi ga’ga da’ma ga’ga viyawun. Viyalaa wuba sukubala ya’k klawun. Klalaa wuba taak vadon si’lokawun.

Ak wuba nak jabi’ ya’k klawun. Klalaa wuba waan glatta, wuba mukvaala tasokawun. Tasolaa ak wuba waivaala silosadakawun.

Ak wuba ya’kvala taba jabi’yakkula tawun. Taka gi’li’laa wuba vaisali’tta bunivala taba ki’bu si’kawun. Si’laa wuba nak naagi’ ak ki’bu si’kawun. Si’laa wuba tasoba takakawun. Wuba kegwivala da’mavala kuvinkawun. Kuvindaa wuba wa’kda’ma tasokawun. Tasolaa wuba jagi’k si’laa taba tavlakawun. Tavlalaa wuba wa’kda’ma kukka gi’li’laa wuba mukvala kutta wuba gu ya’kikawun.

Gu ya’kilaa vaala dadi’ vi’laa ak wubayabi’ lacholaa taawun. Talaa gu ya’kiwun savaku ti’di’ vi’laa taba lacholaa taba ya tukawun. Tuka gi’li’laa gi’k kwasi’laa wuba gi’k ja’gikawun. Ja’gilaa gwaapma viyaka gi’li’laa wuba mukvala gaukwala si’li’kkawun.

Si’li’ttaa taba wuna ta’kwa kwiwun, taba sak yika kalika yaatti’kali’ wak vaala.

Taba gi’li’kali’ vaalana ji’vwa.