Written by: Dr. Naomi Kipuri  (For English translation see her great book: Oral Literature of the Maasai)

Eoro oshi Ilmaasai are, eatae odo-mong’i neetae orok-kiteng. Neisho kuna kishomin neitoki aaoro imiet. Naa kuna orot imiet oshi eimutua ilgilat le Maasai. Naa inji eikununye ena oro.

Ore apa tenkiterunoto neetae Naiteru-kop. Neyam Naiteru-kop inkituaak are. Ore enkitok edukuya neisho nkishu naanyokioo nedung’okini enkarna oolpayiani aajo Nado-Mong’i. Neishori metesheta enkaji enye tentaloishi e tatene e kishomi. Ore enkitok e are neishori ninye nkishu nnarok neshet sii ninye enkaji enye tentaloishi e kedianye e kishomi.

Nedung’okini sii ninye enkarna aajo Narok-Kiteng’.

Nebik apa ake o metoisho kuna kituaak. Neju enedukuya ilayiok okuni. Ore olayioni le dukuya neji Lelian aa ninye oiterua Ilmolelian. Neji olikae Lokesen, neiteru sii ninye Ilmakesen. Ore oliokuni neji Losero, naa ninye apa oiterua Iltaarrosero. Kulo gilat oshi eji ilenkaina e tatene tenkaraki netii enkaji enye entaloishi e tatene e kishomi.

Neisho sii ninye Narok-Kiteng neiu ilayok aaree; oloji Laiser laa ninye oiterua Ilaiser oloji Lukum laa ninye oshi eipotieki Ilukumae. Niaku sii ninje kulo ilgilat le kedianye. Neitayu olgilata pooki olponoto lenye peyie etum aatoor nkishu. Niaku ina oshi peyie epiki nkishu olponoto lenkishomi ololgilata ebaiki taata.