written by: Andrew ole Nkong’oni
Etii apa kulo murran nera apa ninche isiet neeta pookin ildiein. Nedumunye ninche apuo enjore aaru nkishu.
Nepuo ninche too nkolongi kumok, kake eitu apa ninche etum nkishu. Netiru ninche esumash oleng. Kake, meeta ninche endaa nanya.
Nening’okino ninche pee eyieng ildiein anya pee meya ninche esumash. Neyiengi oldia obo nenya ilmurran. Kake, etii apa olmurrani obo oji Lormoti Orok, otanya enya nkiri oldia.
Neitarasakini ninye nkiri, kake nenang’aa ninye. Negoro ilkulie murran oleng. Eure aajo kelo elemurrani alikioo ninche nchere einosa nkiri oldiein.
Neing’oru kuldo kulie murran enaiko pee ear Lormoti Orok. Ore pee ebaiki enkalo oreyiet sapuk. Nejoki ninche Lormoti Orok pee eked olchani, aitaki ninche ilg’anayio.
Neked Lormoti Orok olchani. Neiteru ninche ilkulie murran adung ele shani, ejo pee eurokino Lormoti Orok atua olmoti sapuk, ogut oleng. Nedung ninche olchani asioki: “Lomurran, kainyioo idung’itoto?” Neikilikuan Lormoti Orok. newaliki aajo: “Esiere kintobirita”.
Ore te erishata dorrop neurori oladou chani, otii Lormoti Orok nesulakino ninye olmoti ogut oleng, nelaikino ninye atupuku. Nepuo ilapa kulie murran ejo ninche ketua Lormoti Orok. Kake imeyiolo ninche ajo eitu ninye eye.
Nelotu oloitiko
ajaok enkare. Nejo: “Murrani nchooki enkare pee aalo alikio tiang” . nekilikuan olmurrani ajoki: “iilo ajo aa?” Kalo ajo “wua wua wua”. Nejoki olmurrani: “Shomo amu miyiolo iyie”.
Ore tenkiti kata nelotu orkonoi “Murrani nchooki enkare pee aalo alikio tiang”. Neikilikuan olmurrani. Ajoki “Ilo ajo aa?”. Kalo ajo “uuuu, uuuu”. Nejoki olmurrani: “Shomo, amu, miyiolo iyie”.
Nepuonu ng’uesi naapasha, enaa oltome, olng’tuny, olmakau, esidai, ebarie, onkulie ng’uesi kumok.
Kake, eitu ninche etum enapuo alikioo tiang.
Ore eiting’o osiligi, nelotu enturkuluo. “Lomurrani nchooki enkare pee aalo alikio tiang”. Newaliki olmurrani. Ajoki:” ilo ajo aaa?” Nejoki enturkuluo “ikiji ng’ae?” Nejoki olmurrani: “ Kaaji Lormoti Orok”. Nejoki enturkuluo: “Kalo ajo: Menye Lormoti Orok, nkeenta isiet o ltargeta isiet”. Ng’oto Lormoti Orok nkeenta isiet o ltargeta isiet. Neisho ninye olmurrani enturkuluo metooko enkare.
Ore pee eidip enturkuluo enkare, nelo ninye aitabaya oratioti te enkang. Neng’as olengoti otii irpayiani. Nejo: “ Menye Lormoti Orok, nkeenta isiet o ltargeta isiet!”. Neitoki alo enkitagata o otomonok , nejo: “ Ng’to Lormoti Orok, nkeenta isiet, o ltargeta isiet!”.
Neiture olorere pooki lenkang’ enatejo ena turkuluo. Nedumunye ilpayiani pooki apuo asuj enturkuluo, nenap ninche ltargeta isiet o nkeenta isiet enaa enatoning’oninche.
Ore pee ebaaiki ninche olmoti netumi olmurrani etii empolos enkare. Ne nang’akini nkeenta neitayuni Lormoti Orok, neshipa ntoiwuo enyenak oleng. Nepuo aang’ neishori enapa turkuluo kule. Ore ilapa murran otusulaitie Lormoti Orok, neisik ninche apuo inelakua tenkuruna.