Maasai – Ntemelua

Written by: Dr. Naomi Kipuri  (For English translation see her great book: Oral Literature of the Maasai)

Netii apa, neisho entasat neiu enkerai, nedung’okini enkarna aajo Ntemelua. Neyieng’i olkiteng’ oitaikinyieki enkerai eilata. Neyier entasat ironkena neipang’ alo aramatisho neing’uaa eyiara. Neing’uaa sii ninye enkerai eirura.

Tudumunye ake enaduo ng’oki nedou oltiren paa kejo:

“Moti, tinyikinyiku

Kipiye, tinyikinyiku

Naitayu ngeemi, napik imboyo.”

Neyet emoti nenya ronkena pooki, nepik emoti ilboro neilep alo airura anaa enkerai kiti.

Nejo entasat alotu akurt emoti neinepu emoti naa ilboro ake ootii. Neiputukuny kake eitu eliki likae tung’ani. Neitoki ayier kulie ronkena neipang’. Neisho ake metulusoi enkiti kata neleleunye ajing’ olale. Nedol enaduo ng’oki eyet emoti anya ronkena, nedumaki emoti ilboro. Neitoki aleliari aipang’. Ore kiti kata nening’ enkerai eishir Nelo entasat adumu.

Nelo enkitok ainosaki olpayian lenye pooki toki. Niany olpayian eiruk tukul. Nejo meteyieng’i olker neyieri ironkena. Ore ake peyie eikoni neijia nejing’ olpayian o kulie tung’ana olale aaisudori aarreshu tenaa kesipa enatejo entasat. Neinyiototo Ntemelua nejo:

“Moti, tinyikinyiku

Kipiye, tinyikinyiku

Naitayu ngeemi, napik imboyo.”

Nepalari taa ninye olpayian. Nejoki pooki ng’ae meteena lolan peyie eidurri teina ang’ ina kata ake.

Neeni ake ilolan, neiroti isirkon, neidurri. Neing’uari Ntemelua eirura. Eitu ninye eyae toki tena rruat natii peyie miaku keputunye nening’oo iltung’ana. Ore peyie miaku keliyioyu enkang’ anaa enaidurrieki neji keing’uari enkiteng’, o enkine o osikiria. Neing’uari, ore eorito enkiteng’ o enkine, eru osikiria anaa oshi ake.

Oo naa peyie ejo Ntemelua aputunye neinepu aa ninye ake entung’ani natii enaduo ang’! Nedumunye neosh enkine pau! Neorito enkine ajo mee! Nejoki Ntemelua, “Anaijo mee, neitu duo ijo Ntemelua inyio amu kitung’ayioki!” Neitoki alo aosh osikiria neru sii ninye, neitoki Ntemelua ajoki enatiaka enkine. Neitoki abaiki enkiteng’ neosh pau! Ore peyie eorito enkiteng’ nejoki Ntemelua: “Pesho ijo moo neito duo ijo Ntemelua inyio amu Kitung’uanyioki.”

Nereu Ntemelua enkiteng’ enye neibung’ orregie le naidurra. Ore elo nanang’are ilmurran. Neisho ake meitayu enkiteng’ imodiok neim osidai alo enkoshoke. Nebau ake ilmurran nejo matatalu olopeny enkiteng’ nelau, nereu enkiteng’. Naa keosh ake nening’ entoilo najo: “Tapala enkiteng’ naata olopemy!” Ore peyie eitoki aaosh ae wueji neitoki aaning’ najo: “Shye! Kaji toi ireureo enkiteng’ naata olopeny?“ Netalu ilmurran ina toki nairo ore peyie elau nereu ninche enkiteng’ eilepilep ake Ntemelua o meitabai olpul opuo duo aayieng’ie.

Ore tolpul neiteru duo ilmurran aayieng’ enkiteng’, naa kedung’ ake enedung’ nejo Ntemelua: “Ooi eyiru kidung’!” Nening’oru duo ilmurran entoki nairo nelau. Neton taa Ntemelua ailepilep o meitaini enkiring’o nabayie. Nejo purjuk! Nemanikini etii olmurrani obo enkoriong’, nerepaa. Naa keji ake maitayu nelaikinoi. Neji matudung’u etaa duo nabo osesen lolmurrani nedung’i olmurrani. Ore peyie epali naiku kekedito ake anaa enkiti kerai nanapitae. Neyieng’isho ake ilmurran neisho Ntemelua ironkena, neisho eilata sapuk metooko. Ore ake peyie eok neiliar eilata, nelepoo, netir injo, neirura. Neirrag sii ninye olmurrani. Ore ake peyie eitumurru Ntemelua njo neinyiototo ilmurran aaluarie.

Ore ake peyie elusoo ilmurran nelo olng’ojine olpul asotisho aing’oru iloik. Ore ebel iloik neputu Ntemelua. Neitiamu ake Ntemelua neidaki olng’ojine enkoriong’, nerep. Neton ankata naado enapita olng’ojine. Niaku meidim olng’ojine ashomo atililitayu oing’oru endaa kekwetita ake. Nesasu oleng’. Ore Kenya, nelo olng’ojine ajing’ enkumoto neshurtaa Ntemelua te kutuk – aji. Neya olng’ojine esumash meitieu atupuku, nemeyioloi oshi enetaasa Ntemelua ebaiki ina kata.

This entry was posted in Maasai, Maasai and tagged , , , , , , . Bookmark the permalink.

Comments are closed.