Written by: Dr. Naomi Kipuri  (For English translation see her great book: Oral Literature of the Maasai)

ore apa oldia naa entoki kirotet oleng’ te Nkai. Nemeji naari oldia, ekeji apa Lenanu aitapashipash. Ore tenkaraki nanyika shumata o enkop niaku kelo ake Lenanu aparan Maasinta tenkop neshuko shumata amu ine apa namanya.

Ore nabo olong’ neipot Enkai Lenanu nejoki: “Lenanu, irorie taa Maasinta anaa eniyieu kake milikioo aikata Namaae ai amu mayieu naishooyo”. Nejo Lenanu: “Malikioo”. Ore ake peyie ebaya enetii Maasinta nelaikino atigirayu. Nejoki: “Maasinta, aaliki ena? Eeta oshi Enkai entoki nabo neitu apa kincho najo namaae napir oleng’ nebor naa ninye kenya ake itum nelo osina enelakua. Shomo toomono amu mikimitiki”.         

Ina peyie edumunye Maasinta alo aomonu Namaae. Nejo: “Naai, nchooki taata Namaae”. Neing’asia Enkai peyie ening’ enetejo oltung’ani. Neikilikuan ajoki: “Aing’ae nikitolikio ina toki naji Namaae?” Nejoki Maasinta: “Oloji Lenanu taatolikio”. Neipaaya Enkai Maasinta meshomo aipot Lenanu. Ore peyie elotu Lenanu nejoki Enkai: “Lenanu, ke Namaae ai ishomo alikioo naaitanapa apa ajoki milikioo ake?” Negira Lenanu amu etukurrua niaku mijo ninye eirorieki. Nejoki Enkai: “Ore tenkaraki ena nitaasa ekaaitaa oldia. Ore ebaiki taata mintoki atti enkang’ ai ilo abik tenkop aaku osinga le Maasinta niaku nkik intaa endaa”. Nening’ ake Lenanu enatiakaki neitoki esirai, paa keton eeta enabaiki? Nejoki Enkai: “Papa ore naa amu kitediaa nchooki ntokitin ong’wan ake peyie atum sii nanu atopuaa. Nchooki enkume nemeikenu olng’usil loonkik tenetaa naa ninche naaku endaa ai. Nchooki enkume naing’uaya ndaiki toonkadoru peyie miaku naa kaaya olameyu; Nchooki sii ilpapit oinyiari nabo alo peyie tenaamutiki alilita naidim atulutoi ilpaashien eitu aibung’ ilkiku amu iyiolo ajo meeta entoki nayieu nebolu osinga kewarie. Ore entoki nabayie aaomon naa osesen ronkai neneneng’ oidim atalang’a nkariak nelutoo ineepirik etaa naa kinturrayie“. Nejoki Enkai oldia: “Aishoo nena tokitin pooki nimpoto nimijo ae amu keon intayio tenkaji nasheta”.

Niaku nejia oshi eikuna Lenanu peyie eitemena keon Enkai neponunui aajo ‘oldia’ nenang’uni enkop meeu aisiaai oltung’ani. Ina kias oshi oldia eimua endung’et-e-rashe naji. “Ore peyie einosa oldia nkik mme oliki etala, kiok ming’ani einosa”. Inie sii oshi enotie oltung’ani entoki naji Namaae nelotu adung’oki ae arna ajo ‘Enker’.