Written by: Dr. Naomi Kipuri  (For English translation see her great book: Oral Literature of the Maasai)

Eetae apa nkaitin are: enkai narok o enkai nanyokie. Naa ore ena ai narok naa kebor, naa supat oleng’ nenyor iltung’ana. Kake ore enkai nanyokie naa ketolo nemeikenu olorere. Naa keshula apa kuna aitin te shumata kake enarok natii abori enkae ataaniki iltung’ana.

Ore nabo olong’ niaku enkop pooki olameyu. Nelau nkishu nkujit naanya nelau sii enkare niaku keya iltung’ana esumash. Nejoki nabo olong enkai narok enanyokie: “Matayoki aaisho olorere enkare peyie memut olameyu”. Neng’as enkai nanyokie aany eishori olorere enkare. Nesai enkai narok o metonyorrai. Neji kebolori enkare meshomo enkop. Ore peyie ebolori enkare nesha oleng’ nkolong’i kumuk.

Ore peyie elusoo nkuti olong’i nejoki enkai narok enanyokie: “Taluana taa taata enkare amu eidipa ina olorere”. Nejoki enkai narok: “Maishoo eitoki asha nkuti olong’i amu etoyio oshi enkop oleng’”. Neishori eitoki asha nkuti olong’i. Ore peyie eitoki enkai nanyokie ajoki enkae meiboo enkare neibok enkae, neguar.

Ore toonkuti olong’i neitoki enkai narok ajoki enanyokie menyaaki aisho iltung’ana enkare. Niany enkai nanyokie. Neiteru taa aaishankarra. Nejo enkai nanyokie kemut olorere amu etapashipashita. Nemitiki enkai narok. Niaku ore-oshi o taata tenedar naa enkai nanyokie najo agiru enkae ejo peyie emut iltung’ana. Naa teneikurrukur akiti nemedar naa enkai narok ina natem aibooyo enkae peyie memut olorere.