Written by: Dr. Naomi Kipuri (For English translation see her great book: Oral Literature of the Maasai)
Netii apa ena tito sidai oleng’ niaku pooki ng’ae neya. Neisho ena tito neirriwaa olkilikuai ajo ore pooki ng’ae oyieu neya nelo metishila entito. Negeluni enkolong’ napuoi enkesha. Nepuo taa ng’uesi pooki naaing’oru oshi ena tito. Naa naikitejo naituruk. Nekuso ake nelo, paa kerany ajo:
Ore pee ening’ entito nepuku ake ainining’ nerany sii ninye ajo:
“Maayieu nanu iyie
Entito e Tiyiogo
Naikodo enkang’ enye
Nepiki imporro nkaik
Nepiki intuyutia
Maayieu x 2”
Neitoki enkopera alotu, nejo sii ninye:
“Naitito e Tiyiogo
Tupuku ng’uraki
Enkoilii napera
Terishat ang’itie.”
Neitoki ake entito ajoki enkoili, ”Maayieu, Maayieu”, tosinkolio. Nelotu oloitiko nerany ajo:
Tupuku ng’uraki
Oloitiko on kuyiana
lln kuyianat le long’o
Oitiko oyiogiyiog
Nkiyiogot olmurrani”
Neranyaki entito ajoki “maayieu, maayieu”, Nelotu olng’atuny.
“Natito e Tiyiogo
Tupuku ng’uraki
Oloipurro telerai
Nedotu ntana enkop
Pooki o nkutiti.”
Niany entito olng’atuny. Nelotu olng’ojine etukuse sii ninye nerany ajo:
“Natito e Tiyiogo
Tupuku ng’uraki
Leuu ng’ojine
Nimijo eing’ojine
IIpisia meidimu
Le likae apa otua
Otara torinka
Karururm iloik
Terishat ang’itie
Nimijo esulare
Amu keon eitagol
Olmurrani tenkolong!”
Netoki ake entito aany sii ninye leng’ojin. Neitu emuny eyieu sii ninye netil entito. Nerany nejo:
“Natito e Tiyiogo
Tupuku ng’uraki
Enkaiserri olmunoti
Namiru ilchekuti
Kilome meitadiak
Oritet olmoruo
Nelo enkumpau enkop
Neipirrar emakat.”
Niaraa entito emuny ajoki maayieu. Nerukunye taa ake ing’uesi. Neitu enkiteng’, nerany ajo:
“Natito e Tiyiogo
Tupuku ng’uraki
Pararang’ eibala
Nalepi tosiang’au
Nelo olaburra enkop
Nesaru ilchekuti
Pooki o ng’aturan.”
Neing’or ake entito enkiteng’ nerany ajo:
“Maayieu nanu iyie
Entito e Tiyiogo
Naikodo enkang’ enye
Nepiki intuyutia
Nepiki imporro nkaik
Maayieu x 2”
Nerukunye taa ake ing’uesi eponu ake aakesha niany entito pooki. Ore te siadi nelotu karbobo. Nerany sii ninye nejo:
“Natito e Tiyiogo
Tupuku ng’uraki
Lentore e Topisia
Nemeidimu sirkon
Olopeny ake onap.”
Nening’ ake entito enetejo karbobo nerany sii ninye ajoki:
“Kaayieu nanu iyie
Entito e Tiyiogo
Naikodo enkang’ enye
Nepiki intuyutia
Nepiki imporro inkai
Kaayieu, kaayieu.
Neya karbobo entito.