Written by: Dr. Naomi Kipuri (For English translation see her great book: Oral Literature of the Maasai)
Netii apa, netii ele kurruk oyieu oleng’ entito naayam. Neisho nabo olong’ nedumunye neishop enkila narok, nepika masaa shaati nekuso peyie eji koltung’ani netil intoyie. Nedumunye nelo enkang’ nabo aing’oru entito.
Nelo taa ninye atum entito natisira. Ore peyie eirorie menye entito nejoki: “Aishoo entito kake shomo taanyu metubulu peyie ilotu arik”. Memus olkurruk peyie etum entito, kejo ake kanu kenya ebulu peyie erik. Niaku kelo ake abaiki enkang’ enkaputi aleenoo entito tenaa ketubulua. Kake ore eleenoo ejur sii ninye entito o metodua ajo meisiriri irregiei loltung’ani, ijo makurruk empukunoto.
Negirakino apa entito inaataduaa o meeu kenya aliki ng’otonye. Nejoki: “Nini, emikinchosho ele tung’ani amu ijo olkurruk”. Nejo ng’otonye: “Eji olkurruk! Nchoo naa kinya”. Negira entito. Neitoki aliki papaai lenye. Nejo sii ninye, “Eji olkurruk! Nchoo naa kinya! Tenaa koltung’ani imba tolimu kake minor olpayian leme esidano eeta”. Eitu eitoki entito aimaki oltung’ani peyie miaku kejo menye aimeeta oldau. Ore peyie ebau enkolong’ nariki nesuj olpayian lenye maakutiti eishirita anaa peyie eishir ntoyie pooki eriki.
Nepuo, nepuo, nelang’ ilkejek, neked ildoinyio nedung’ entim aapuo. Nelusoo nkolong’i kumok etii enkoitoi. Nejoki entito olkurruk, “ Amaa, emeekure toi kenya kibaya?” Nejoki olkurruk: “Eton elakua enkop”. Neitoki aapuo, nepuo nejoki olkurruk entito, “Keton kiporito ilojong’a lenkop inyi?” Nejoki entito, “meekure”. Neitoki ake aapuo neitoki ajoki “Keton idolita modiok oonkishu nyi?” Nejoki entito: “meekure adolita”. Ore peyie eitoki aapuo eneedo neitoki olkurruk ajoki entito “Keton elioo ildoinyio lenkop inyi?” Nejo entito anang’ silig atalu neitu edol. Nejoki: “Meekure elioo, eimiso”.
Neisho ake olkurruk peyie ebaya empolos entim naripa nedol ajo etalakuana enkop nejoki entito metakedo olchani. Ore ake peyie eked entito olchani neitayu olkurruk enaduo kila narok o masaa muj. Ina peyie eiting’ie taa ninye entito ajo olkurruk abaraki. Neirut oleng’ nelau eniaas. Nejoki olkurruk entito, “Nairo ena, nchiru taata minyi o ng’utunyi amu tena apa aalotu anya”. Nelo ninye asotu ilkeek oolutu apejie entito.
Ore ake ena naimis olkurruk tentim nerany entito ajo:
“ Yieyio, papa
Keitu apa ajoki
Mikincho ele tung’ani
Amu olkurruk
Nijo kukuny aisho!
Neigil entito arany katitin kumok.
Ore teina tim netii duo ilmurran oing’ua olamayio looshukori inkang’itie. Netii kulo murran olong’arie kina ena tito, netii olang’ata olkulikae aare ooboitare. Ore erany entito nening’ olang’ata nejoki olalashe entito: “Shye anaijo enkanashe ino ina naning’o erany tentim?” Nejoki olalashe: “Ee pae sii apa kinyial ena tito e yieyio elukunya, ketaa tenining’ imotonyi nijo ninye itoning’o?” Nejo ilkulikae mainining’o nesipu taa ninye aajo ninye ina, nepuo aing’oru. Ore peyie etum neinosie ilomon neliki entito ajoki eishooyioki apa aisho olkurruk laa ilkeek eshomo asotu oolotu apejie anya. Neisho ilmurran entito oringa nejoki metooshie olkurruk elukunya nenejo akedoki nepuo ninche aigara inkeek teine.
Ore peyie ebau olkurruk neinok ake enkima sapuk nejoki entito metaduo teina kata. Nejoki entito, “madou”. Neiputukuny olkurruk oleng’. Neikoroj entiito ajoki, “Ae pae sii duo itum ilkulinyi likimitu!” Nejo takedoki newuap ake entito oringa neosh elukunya. Ore ina kata ake neipang’u ilmurran tentim neparripar olkurruk teine. Nerik entito ang’.