Written by: Dr. Naomi Kipuri (For English translation see her great book: Oral Literature of the Maasai)
Netii apa, nepuo inkera aanya ilamuriak. Nera apa kuna toyie uni, are botorok o nabo kiti. Nejo kuna botorok. “Emaikeno sii intae inkonyek peyie kidol enaitayu ilamuriak ooto medolita”. Neiken ena kiti kake eitu ninche eiken kuna botorok. Ore ake peyie eidipi aitayu ilamuriak, neboluni inkonyek paa kepuoi ang’ eton eitu eing’urari ilamuriak oitayioki. Nepuo ake intoyie, ore pee ebaya auluo nejo emaing’urai ilamuriak nenyorrikitaa iloojon ake ninye eeta entito kiti. Negoro oleng’, neishir nejo: “Imayaki ake ninye nini lai ilamuriak oojon, ekarrinyo ake enaduo shani aitayu ilooto”. Nesai inkulie aajoki peyie melo amu emuto peyie eoriki ilkulunye, niany tukul eton.
Nerrinyo entito kiti enaduo wueji. Ore duo ejo aitayu ilamuriak, nejoki enkukuu, “Nakerai mikidany enkong’u”. Neirut ena tito oleng’. Neikilikuan enkukuu, “Iyieu naanya tenna iyieu naitaa enkerai?” Nejoki entito “Oi intaaki enkerai”. Nerik enkukuu enkerai omeitabai enemanya oshi. Naa keji apa ena kukuu Mbiti. Neeku keitoti Mbiti ena tito oleng’. Neyiang’aki ilkerra anaake. Naa keisho ake peyie eyieu neing’uraa tenaa ketopiro entito, neud tolkikuei. Nedol ajo osarge oimu. Naa tenejo entito aikilikuan ajo kainyioo peyie kituudo, nejoki Mbiti, “Oi eitu aaotiki enkerai ai”. Neitoti apa o metasapuka entito oleng’ kake kejo ake aud neimu osarge. Neitoki ake aitoti oleng’. Ore akenya peyie eitoki aud, neimu eilata. Neyiolou taa ninye ajo etopiro entito etaa keinosayu.
Ore nabo olong’, nedumunye Mbiti alo ariku inkulie ng’uesi peyie elotu ang’arie entito. Kake ore etioyo, nelotu olkurruk ene wueji netii ena tito. Neinepu entito ekitito endapana olker. Nejoki olkurruk entito, “Natito nchooki empalai peyie aaliki ena”. Nejoki entito, “Shomo amu meeta enikiliki”. Nenang’ tosoit meshomo. Neitoki ake olkurruk amanu tiae alo. “Natito nchooki sii empalai peyie aaliki ena”. Neton duo entito emitiki ake olkurruk empalai ometanang’aki ade nejoki, “Inosa esepe hoo nemeeta enikijoki”. Ore ake peyie eidip olkurruk ainosa esunyai, nejoki entito, “Ore taa amu eshomo duo Mbiti ariku inkulie ng’uesi pee kiponu aanya, inyio ielare inkuruon niim ena oitoi naimu inkukuuni, isika shomo enkang’ inyi. Naa tenikinkilikuan inkukuuni ajo ira eneng’ae nijoki, “Ara enchoni oonkuruon nalo ake”. Neinyiototo entito aas enatiaka olkurruk. Neishop enchoni musana, neelare inkuruon paa kelo aim ena oitoi naimu ade ing’uesi amu ina oitoi ake nalo enkang’ enye.
Ore ake peyie elo entito enkiti wueji nenang’are eluata e dukuya oong’uesi. Neikilikuan aajoki, “Natito ira eneng’ae?” Nejoki entito: “Ara enchoni oonkuruon nalo ake”. Nejoki inkukuuni: “Elioo ajo mira ena tito e Mbiti nagila engelemian isiet nikipuo ade pooki aapukorie” Nepuo ing’uesi, nelo sii ninye entito. Neitoki ake entito anang’are ae luata oong’uesi. Neikilkuan ing’uesi, “Natito ira eneng’ae?” Nejoki entito: “Ara enchoni oonkuruon naloolo ake”. Nejoki ng’uesi: “Shomo amu mira ena tito e Mbiti nagila engelemian isiet nikipuo ade pooki aapukorie”. Neishori entito meshomo.
Nelo taa ake entito engang’are ake nkukuuni neikilikuan pooki aajo keneng’ae, nejoki ake entito, “Ara enchoni oonkuruon nalo ake”. Negiroo inkukuuni pooki. Nelo ake entito o metanang’are inkukuuni naabayie naa ninche etii Mbiti. Neikilikuan Mbiti ena tito ajoki, “Natito ira eneng’ae?” Nejoki entito enetiaka inkulie ng’uesi pooki, “Ara enchoni oonkuruon naloolo ake”. Nejo ayiolou penyo. Neitoki ake aikilikuan, “Eji itejo ira eneng’ae?” Neitoki ake entito ajoki enaduo ake natiaka: “Ara enchoni oonkuruon naloolo ake”. Nejoki entito, “Elioo ajo mira ena tito ai nagila engelemian isiet nikipuo ade inkukuuni ena kop pooki aapukorie”. Neisho inkukuuni pooki entito meshomo, nepuo sii ninche enkang’ e Mbiti.
Ore peyie ebaya ang’, nejing’ duo Mbiti aji aitayu entito. Oo naa ejo inkuna inji metii entito! Neyiolou ajo einosa enkop. Neyiolou ajo ninye enaduo najo keon enchoni oo nkuruon. Neyiolo ajo anaata etalakuana entito meekure ejo meinepua.
Nesotu inkulie ng’uesi ilkeek ooinokie enkima, neinok enkima sapuk oleng’. Netoni aanyu Mbiti meitupuku entito o metumuta lelo keek enkima. Neitokini aasotu ilkulie. Neji taa ake, “Mbiti intupuku toi ade entito”. Nejoki Mbiti, “Entasho toi amu isekenke alaku”. Nesotu taa ake ng’uesi ilkeek emut ake enkima. Ore peyie eitoki aajoki Mbiti meitupuku entito nejo, “Entasho amu elukunya olker aarita”. Etoning’o taa inkulie eidong’isho Mbiti tiaji, aa enkumoto najing’ eturito. Ore ake peyie egutu enkumoto, nejing’ ake Mbiti nenukaa keon amu eyiolo ajo tenelau ade ng’uesi entito nedoiki ninye.
Ore peyie edol inkulie kukuuni ajo meekure duo eitupuku Mbiti entito netumuta iladuo keek ootasotuoki enkima, nening’ aji aing’oru. Neer enkaji pooki aaing’oru Mbiti o metalaita. Netoni tengoro sapuk.
Neetae duo eng’ues nabo naata enkerai kiti. Neiteru ena kerai aishir aa esumash eeta. Nejoki ng’otonye: “Yieyio nchooki olkina peyie aaliki ena”. Nejoki ng’otonye, “Idol iyie kitalaita Mbiti nijo nchooki olkina, inchira amu mijo maishoo”. Neitoki ake enkerai aomonu olkina, “Yieyio nchooki olkina peyie aaliki ena”. Nejoki inkulie kukuuni ng’otonye ena kerai: “Aha, nchoo amu etejoki apa edol enkerai ilainyiamok eitu edol menye!” Neisho.
Ore ake peyie eidip enkerai atanaa nejo: “Neidia entikiyai e Mbiti!” Eeta apa Mbiti enkiti sikirai naenikino enkidong’oe, ore peyie ejing’ enkumoto, neing’uari entikiyai erumisho. Neitayuni Mbiti tenkumoto, neisuyusui tenaduo kima, nepukorie inaduo ng’uesi pooki. Neitining’ sii ninye Mbiti teine.