Maasai – OLE SAYIALEL OLMOTONYI LOOLMURRAN (Ole Sayialel and Eagle)

Written by: Dr. Naomi Kipuri  (For English translation see her great book: Oral Literature of the Maasai)

Ntii apa, netii kulo murran, nepuo enjore. Neari olmurrani obo oji Ole Sayialel metua. Ore peyie edol ilkulikae ajo etaa ninye etua nedumu osesen aaya entim, nelak ilpapit. Ore peyie eidip aatalak neing’ua tentim. Nepuo ninche ang’! Ore ake pee ebaya ang’ nepuo pooki ang’ae anang’are. Ore intasati ahaa ilpayiani leitu edol inkera enye tiatua ilkulikae neyiolou aajo etaraki tenjore, imeitoki aikilikuanisho.

Ore ake peyie elusoo ilkulikae, nelotu olmotonyi loolmurran neinepu oladuo murrani otua. Near toonkopir, near omeijutujuto olmurrani. Neitoki aar near omeibelekenyayu. Neitoki ake aar near, omeinyio aton. Ore ear, neinyototo olmurrani aitashe ometudumu oloonkejek akwet. Nerik olmotonyi olmurrani omeitabai auluo enkang’ enye. Ore epuoito nerany ele murrani osinkolio eranyaki ele motonyi ajo:

                                  “Lomotonyi lido, olotie enkewarie elotie endama

                                  Shomo iroroki intokitin uni nimimen

                                  Iroroki papa lai lolgisoi onyokie

                                  Iroroki yieyio lai nabaiki imporro enkop eitashe

                                  Iroroki sii enkanashiai nabaiki enkuriny enkop eitashe

                                  Niyiolou ajo nkarunot empere ai napukenya eturruo

                                  Iroroki sii mokopit, mokopit ai narridi toonkokirisia

                                 Mowuarak pee mebulu ilasho loonkulie ilairakuj eimula

                                 Tiaki tumulang’a ning’oshoshu enkiteng’ ai

                                  Pee mikiya ilajung’ok.”

Nerany olmurrani ele sinkolio ometabai auluo enkang’ enye. Neinepu intare enye edaa tiauluo. Neikilikuanishore olmurrani inkera natii intare. Neliki inkera olmurrani ilomon pooki liang’. Neliki ajo etalaki apa olmurrani lenkang’ Ole Sayialel tenjore neaku keisinanuo enkang’ enye. Neliki sii ajo etaapishe enkiteng’ naji mokopit eilo murrani otua neaku ong’ata eirrag anaa apa peyie elai olopeny. Neinosu taa inkera ilomon pooki ebaiki ilentito apa nanyor ele murrani. Neliki ajo etanya apa ena tito lkulie murran pooki anaa apa peyie elai olchore lenye.

Ore apa ena tito naa kenyor apa ele murrani ake duo entorrono. Ore aka peyie ening’ ajo etua neaku keisinanuo anaake. Keton ake aishir endama pooki naa penyo nenya endaa. Naa teneishopo duo inkulie toyie enkolong’ naatae osirua, neton ninye tiang’ aisinanuo. Nemeishop imasaa anaa inkulie toyie, nemenya olkaria. Nedung’u apa osinkolio oranyaki ele murrani onyor ajo:

                            “Olowuaru lai lenkare e Koikai

                             Inosa nimut ning’ua enchabar

                            Ooi enchabar ai Ole Sayialel

                            Papa Sayialel oisalata apa

                            Aibung’a enkare

                            Aibung’a enarok

                            Aibung’a maok

                           Ooi enchabar ai Ole Sayialel.”

Neaku ele sinkolio erany ninye inkolong’i pooki metadoi enkolong’. Nejoki ilkulikae murran, “Amaa kenya tenetua olmurrani obo eming’oru likae?” Nemeyieu ena tito likae tung’ani Ole Sayialel ake.

Neibung’ ele murrani olkine lenye opir, neyiang’aki ele motonyi paa kejoki sere. Nesai inkera oontare aajoki peyie meibung’ ilo amu oleina ang’ natua olmurrani. Neany ening’. Imeteiki taa ninche inkera aajo ilo murrani apa ele otejoki etua, naa olenye olkine. Nsipirri inkera ang’ aalikio ena nataasa olmurrani, nejo: “Eewuo olmurrani lemesheta ilpapit, neibung’ olkine ayiang’aki eng’ues narikito.” Nenining’isho ake ena tito neyiolou ajo ebaiki naa olchore lenye ilo oimakini.

Neipoti ilmurran, neing’oruni eneikoni peyie elikini menye ong’tonye. Ore ake peyie edol ng’otonye neiterre. Neitopiuni. Ore ake peyie eitoki adol, neitoki ake aiterre. Neiterre katitin ong’uan. Nelikini sii ninye menye. Ore ake peyie eidip Ole Sayialel airoroki olorere pooki, neitoki arany oladuo sinkolio oranyaki olmotonyi.

Ore ake peyie ening’ Mokopit oltoilo lolmurrani, nekwetu enetii, anaa kejo airoroki. Nesupatu, neishoru metalepi. Ore ena tito apa nanyor ele murrani nelo metabarni, neela anya ereko anaa enoshi nalo osinkolio. Neishop imasaa enyena pooki. Ore peyie edol intasati neng’as aajo tenaa kenoto likae shore, kake etasiokitio aayilou aajo olchore lenye oewuo.

This entry was posted in Maasai, Maasai and tagged , , , , , . Bookmark the permalink.

Comments are closed.