Written by: Dr. Naomi Kipuri  (For English translation see her great book: Oral Literature of the Maasai)

Netii apa, netii ele moruo. Nelo aparan enkang’ enkaputi. Ore peyie ebaya ang’ ejing’ enkaji enkaputani. Neinepu etii emintilisi enkima o kulie kiri nemetii entasat aji. Nedumu ake ena mintilisi nepik emootian. Nerikito ena mintilisi enkukuo naishu kake eitu ninye eyielou olmoruo. Neiken emootian asiokisioki peyie meinepu entasat.

Ore enatonie nejing’u entasat openy enkaji. Netoni aanya lomon leseriani oonkera. Ore peyie eidip aainosa lomon niaku duo enkata narrinyo olpayian. Nedol entasat epuru emootian nejoki olpayian, “Shye, Paker anaijo kepuru emootian?” Nejoki olpayian, ”Olakaishirtita lotii ene onana lukunya lolpiron laa teneoshiosh imbaa o onoose nepuru.” Negira entasat, neinyiototo aitarioo olaputani.

Ore oton eitu epuo eneedo nenya enaduoo mootian enkima ometung’ung’uro. Nejo mbaa tiak! O enaduo mintilisi! Netii entasat tesiadi. Nejo entasat, “Orrid! Keitu due ake ayiolou!“ Nejoki olpayian, “Oi Paker ai minya!” Neipirri entasat arrinyo ang’ tenkurruna, nekwet sii ninye olmoruo alo. Neishoro ‘Ilkurumi. Nelo sii ninye ilo moruo oulu aikunari neija.