Told by; Poneso Mwamo Written in ShiYei by Oscar Lebopamo
With special thanks to Marlene Sullivan Winberg and Willemien le Roux (For English translation see the great book: The STORYTELLER, Folktales from the Kalahari desert and the Okavango River in Botswana).
Kwara tire Odimwe endji morombwana mone dliwe.
Morombwana yoo enji ye mare ko kosa odimwe edzoo shika moiqhamina wa dimwe masoko nema masoko anga wa tiiqhe.
Mayowa koongo ngashi dhla lit`sha odimwe koko yisa kwake keembe kake akatande mone shimwe (eyie). Morombwana yoo yeye kana koko kara kwake a kerishire odimwe atikea pwaaka koya, ya shangana zidhlawa za ezhu.
Wara tire naqha ngaho akeopaa zimbara ngaziti kita, omwaka wo womwe eko koya embara e rufho, mayowa kongo ngeshi odimwe a ma tenda kokotanda”, koka dhledzera ngaho tjindji shaa maka yana.
“Ro suko remwe koko kita mayowa anee ngama tongana kokhu shidlhuwa shiwa tidhla”. Kwari ko zuo moko tikea kopomo took timwana etjimwe shati tshoranganya.
”Nxane koshiri ko keopaa”, Odimwe ako yerwa ko mohoporo wo mobi shi morombwana yaa maratire nakee, Odimwe kati tshoroka ko enjara ndati koziera”. Kopomo tokoti modhlaaya mazhu neefono ake, rosoko ro mo thano ako endjimbo yeye injara.
Morombwana yoo yeye aka tizierwa akeopaa tana kati djukaasa moshoro ngaho yeye enkha enjara yamoebe. Odimwe ako shemorura komo eharu amina, ao,” omotu modhleeti, morombwana kati mwana atikea anji hamono kora keke koko dhlewa kwake, ako takere, Odimwe ako moyimbira endjimbo ake.
Enyama yo morombwana!
Oxhamoxhamo wayo
Enyama yo morombwana
Oxhamoxhamo wayo
Enyama yo morombwana
Ommoto aedhi!
Akati yimba akeopaa yeye konie maka shera koyera ama Timo year shiengoro atikea aka shere koko kee, morombwana mayopa tana kati tshatshadhlika. Kati shumorura kokashara naotshe taa papa kee.
Kati kera ako mo kamba mone-esungo ake kone yeye mapata mati yimba, kati
shimorura kotsiina morombwana tama kati kati poo! Aaka, tiebee…dhlakoke atikea ndjaa madzeri kanyaoya koko wonyama oxhamoxhamo, kodhla tama re katahuna mofupa xopoko.
Nataa komana kodhla morombwana ake xopoko, eembara yezodhlowa yekoya, yeye enjeeke, endzoo endziyo yekoti hendekoo zindhlowa zozo zara nyaanyi moniyii. Xopoko wadimwe waa mare ko eqhminwa komorombwana ake ne zikhani zizimwe kokhu yamatizi pata nake.
Odimwe yinie matindiexhe atikea kotura noka ko tura no womwe no womwe ngaho. Kotanga kodhlaeri amana atikea wayeyi wawo ko tura nawo emana kere.
Moyeyi (oomutu) yomo bibirikwe ka pomo ku tura yeeke. Odimwe yenee nangweza mati tiiqhe atikea nanga kwa bipangahare tiriye koexhwaakayi amena wawo titire nawoo, shiko tikea omotu enjiye ka pomo ko tura yeeke.