Written by: Dinote Kusia Shenkere Edited by: Dr. Ongaye Oda Orkaydo
Xattaayye, lukkalitta ka alla’ittaa ollin kalaa ki’ni ka pisaneeyye piita filfilli ka damta karaa faddanni.
Oo kayti kuyyanta takkaayye, alla’itta a damta faddanniyooyye, marfeetaa akkay ka qeeday ka
japarraa olpa heddishay ka xoollaa’ kodaday. Lukkalitta ka alla’itta akkay ka qaraayye pora a oppaa
xoollaa qeenniyan kaassaday. Maana mallaa assi alla’itta qaraa kaassati? Qootaa alla’itta montan
xa’anniyo malla. Alla’itta ka ki’nee, “Marfeetan teyay ka qeeday ka japarraa olpa heddishay ka
xoollaa’ kodaday ka ishan qoyra a dera dera qara’e ishin kuti’ni. Lukkalitta ka xoollaa kodattaa’e
marfeetasi alla’itta qaraayye qinsaday ka xoollaa heddisattaa paayyay. Etee xoollaasini
heddisanniyooyye, doxa ka isha qapay ikka marfeetasi miissaa kela’ juutay ka kapaa damta faddatta’
aanay.
Oo ooray poraa oppa’e marfeetasi xaayaye tura’ patay. Kuyya’ta lakki kammaa alla’ittasikka
marfeetasi kaassanni ikka kidaye, “Marfeetasi doxaa ana pirri anka miissaa kelaxata xaayay ka
damta faddata’e aanay. Oon tiitaawiniyooyye, porasikka ana tura’ patay. Infadday kuyya’ta lakki
kammaayye xooyew.” Alla’itta ka kuyya’tasi lakki piray ka aanayew. Umma lukkalittasi marfeetasi
inakkini. Alla’itta ka kidaye, “Indoxayey waan damaa ana’ daashi.” Lukkalitta ka qootaa alla’itta doxay
malla nyelqaadippaayye takka qeetti ka ishi’ daassi ikka damay. Awta piliyaate, alla’itta idyayew ka
lukkalitta’ ki’ne’e, “Marfeetaawu daashi.” Lukkalitta umma marfeetasi inteyni. Ikka isha isqaraa
kalissaa malla nyelqaasini xaadippaa takka qeettew ka isha’ daassew. Ikka damay ka tawayey.
Alla’itta ka sedi kolladay ka awtaa nyelqitteeta a lukkalitta damta heeno piisa mina’e marfeeta
kaassatta’ de’ni. Ka assi koday ka nyelqaasine a lukkalitta piisa piray. Lukkalitta umma haka
awweeti’e marfeetasi inteyni. Sedimmallaa haka awweeti’e lukkalitta marfeetase a alla’itta patti
faddiya mallaa piita qonni; alla’itta ka haka awweeti’e marfeetaade a patti malla nyelqaa a lukkalaa
damta diinnin kinnin. 