written by: Andrew ole Nkong’oni

Etii apa enkanasa sapuk oleng olmaasai. Neitobir ninche emanyatta sapuk nemany ilmareita kumok oleng.

Neiriwaa ninche ilmurran lenye meshomo enjore. Nemayian iltasati kituak tenebo oloiboni leina manyatta ilmurran lenye nepuo ilmurran enjero.

Ore eshomo nkoling’i are neduaya ilmurran eng’uesnatii ong’ata nanyaanyukie esidai. Kake eitu ninche eurishioyu amu kepi apa ilmurran loolmaasai.

Ore ninye ena ng’ues neme esidai eji oltatuani oishopo nkopirr esidai pee meyiolou kulo murran. Neiken ninye oltatuani ilmurran tenelakua: “obo, aare, okuni…. tikitam”. Nemut ninye ilmurran neya iremeta enye olalema lenye enkapune namanya ninye.

Nepuo nkolong’i kumuk eitu eshukunye ilapa murran, neiriwari ilkulikai murran meshomo enjore kake eitu apa eshukunye sii ninche.

Nepik enkang oloputukunyi sapuk, kake neiriwari ilkulikai murran meshomoito enjore, kake oore tekulo murran neipot apa olpayian obo olmurani lenye, nejoki: “shomo taa, kake miloaka dukuya ilmurran oore eninko isiadu te siadi pee ijurru ajo kaainyio oshi nanyita kulo murran”.

Ore peyie ebaiki ilmurran ong’ata, nedol eng’ues naijio esidai. Kake nesiadu oladuo murrani pee ejurr ajo kainyioo apa nainosa ilkulikai apa murran ooshomo enjore te dukuya.

Neiken ninye oltatuani ilmurran enaa enatamoo, ejo: “Obo, aare…… tikitam ookuni..”. Kake, nelau ninye olmurani obo. “Kaji eima likai murrani?” Nejo ninye keidang’a.

Ore olapa murrani obo nejing engumoto, nedol oltatuani enyita ilmurran nemut nenap inareta enye aya enkapune enye.

Ore pe eku kewarie, nelo olapa murrani emanyatta, aya ilomon enaa entoki apa natoduaa. Nejing apaninye ina anasa oloputukanyi sapuk, kake neiguana ilpayiani kituak eing’oru enaiko pe eer enang’ues.

Nelusoo nkolong’i kumuk oleng, neiriwari entito nabo sidai oleng, alang intoyie pooki ina manyatta. Nejokini pee lo enbata enkapune oltatuani nebik egira ajurr ena ng’ues. “Natito, kainyio ing’oru tene?” nejoki oltatuani.

“kaiminua atapongo enkoitoi” newaliki entito.

Nebik entito nejoki oltatuani shomo taaisere talama ene kake neeny ninye entito elo teine.

Nepuonu ninche kulikai murran aikilikuanishore entito enaa kainyooetiaka oltatuani. Neyoki oltatuani aaku olchore lenatito neirag ninche endapash nabo.

Kake, ore ninye oltatuani keyok isaantomon entedekenya, alo areshoo iltunganak anya. Neyiolou entito olkuak loltatuani ometayooki ilmurran apuonu aikilikuanishore entito netum ninche oratioti pookin.

Nejoki ilmurran entito, pee eirorie oltatuani ometabaiki saa tomon, paa keisho meirurayu, pee epuonu ilmurran ang’or too remeta metua.

Nelotu oltatuani egira ashipa neyiang’aki entito olkerr opirr oleng. Ore teina kewarie nenya ilomon oleng, nekueni ninche tenchipai sapuk. Ore tenkai shoto neetuo ilmurran nepik iremeta enye enkima ore pee eirura oltatuani, neisiku ninye entito neng’or ilmurran oltatuani too remeta neishir ejo: “Ayiolo apake! .. eer inkituak ilewa!… eer inkituak ilewa!”

Neri oltatuani metua nebik olorere te enchipai sapuk.